Tirk nikarin ji kurdan birevin!

Gava ku Hakan Savaş Mican li Parîsê ye, ew rastî penaberekî kurd ê ji Tirkiyeyê reviyayî tê. Ew tirk e û di êşên wî penaberê kurd de zilm li ser navê tirkîtiyê tê kirin

Hakan Savaş Mican derhênerekî şanoyê yê li Almanyayê ye ku bi eslê xwe tirk e. Ew derhênerê lîstika şanoyê ‘Şeva Lîzbonê’ (Die Nacht von Lissabon) ye. Ev lîstik ji pirtûka bi heman navî ya Erich Maria Remarques hatiye wergirtin.

Çîrok di serdema Naziyan de derbas dibe û behsa penaberiyeke li seranserê Ewropayê dike. Zilamekî ku navê Josef Schwarz li xwe dike, tevî jina xwe ya li ber mirinê, ji birayê wê ku fermandarekekî payebilind ê SS a naziyan e, direve.

Ji bo derhêneriyê Hakan Savaş Mican dide ser şopa mekanên di romanê de Portekîz, Spanya, Fransa û Amanyayê. Kamarevan Benjamin Krieg jî pê re bû û jê re dîmenên kurt amade kirin. Em zêde nedin nav çîroka amadekirina lîstika şanoyê, axir lîstikeke şanoyê ya di navbera fîksiyon û rastiyê de çêdibe; lê tiştekî hêjayî behskirinê heye di vê meseleyê de.

Gava ku Hakan Savaş Mican li Parîsê ye, ew rastî penaberekî kurd ê ji Tirkiyeyê reviyayî tê; ji ber vê jî li şûna Parîsa di romanê de ew Parîsekê dibîne ku dike wijdanê wî ne rehet be: lewma ew tirk e û di êşên wî penaberê kurd de zilm li ser navê tirkîtiyê tê kirin.

Axirî ev hevdîtin bandorekê li wî dike ku di lîstikê de bi cih bike. Lewma di vê lîstikê de Dimitry Schaad çîrokbêj e, ew behsa tevahiya gera Hakan Savaş Mican û nivîsên wî yên di rojnivîsa wî ya dema vê gerê de dike. Schaad behsa hevdîtina bi penaberê kurd li Parîsê dike û ew her wiha dibêje, ka çawa ev bandorê li wijdanê derhêner dike; lîstik bi vî rengê xwe dişibe stand-upê. BERLÎN

Dikarî Biecibînî