7’emîn Mîhrîcana Şanoya Amedê dest pê dike

Dê Mîhrîcana Şanoya Amedê ya 7’emîn di 26’ê nîsanê de dest pê bike. Şanoger Yavûz Akkûzû diyar kir ku ew li benda hemû şanohezan e

Dê Mîhrîcana Şanoya Amedê ya 7’emîn di 26’ê nîsanê de dest pê bike û heta 5’ê gulanê dewam bike. Dê ji Amed, Wan û Stenbolê gelek komên şanoyê tev li mîhrîcanê bibin û her wiha dê ji Mahabadê jî komek tevli mîhrîcanê bibe. Dê mîhrîcana îsal diyarî şanoger Mehmet Emîn Yalçinkaya bê kirin ku par jiyana xwe ji dest dabû.

Şanorger Yavûz Akkûzû diyar kir ku ew ê mîhrîcana îsal diyarî lîstikvanê Şanoya Bajêr a Amedê Mehmet Emîn Yalçinkaya bikin ku par jiyana xwe ji dest dabû. Akkûzû anî ziman ku ew ê di mîhrîcanê de bi şanoya xwe der barê çalakiyên greva birçîbûnê de jî hin peyaman bidin û bal bikişînin ser tecrîdê.

Li benda şanohezan e

Akkûzû anî ziman ku dê merasîma vekirina mîhrîcanê li Eywana Şanoya Bajêr a Amedê pêk bê û wiha got: “Piştî merasîma vekirinê dê mîhrîcan li Navenda Çand û Kongreyê ya Şaredariya Mezin a Amedê bê lidarxistin. Em li benda temaşevanên xwe ne. Hêza hunerê ya ku mirovan bîne cem hevdu heye. Ez bawer dikim ku wê temaşevanên me jî li ser vî esasê tev bigerin û xwedî lê derkevin.” AMED

Dikarî Biecibînî