Bi kilaman êş û azara xwe dibêje

Dayika bi navê Sebeha Receb Rustem ev 40 sal e çanda kurdî diparêze û kilaman dibêje. Dayika Sebah jî wekî hemû dayikên kurd li ser êş û azarên kurdan û keça xwe ya şehîd kilaman dibêje

Gelê kurd xwedî çand û folkloreke resen e. Kilaman jî di vê çandê de cihekî girîng girtiye. Bi taybet jinên kurd dema diçûn ser kaniyê, çêrê yan jî li ber dergûşan xwe kilam û stran digotin. Jinên kurd ku kilam ji dayik û pîrên xwe girtin, heya roja îro nifş bi nifş dan jiyandin.

Sebah Receb Rustem a 55 salî ji navçeya Ehresê ya kantona Şehbayê ye û dayika 6 zarokan e. Kurekî wê astengdar e. Malbata dayika Sebah di xaniyekî li ser kolaneke qerbalex de dijî.

Dayika Sebah şêniyên Efrînê yên ku ji ber êrîşên dewleta tirk û çeteyan berê xwe da Şehbayê, bi tenê nehiştin. Deriyê mala xwe li ber wan vekir û ew hembêz kirin. Dayika Sebah a ku mala wê ji 3 odeyan pêk tê, odeyeke xwe da xelkê Efrînê û ev ji salekê zêdetir e bi hev re dijîn.

40 sal e kilaman dibêje

Sebah ji 15 saliya xwe ve kilaman dibêje. Dayika Sebah di ciwaniya xwe de li gel pismanên xwe yên di dawetan de li def û zirneyê didan, stran digot.

Dayika Sebah xwedî dengeke zelal û pak e û ji aliyê nasên xwe ve pir tê hezkirin.

Sebah di temenê xwe yê 17 salî de dizewice, wek piraniya jinan jiyana dayika Sebah jî bi zewacê vediguhere êş û azaran. Wê jî li ser vê rewşê kilam çêkirin û di her dîwanekê de digotin.

Dayika Sebah bi naskirina tevgera rizgariya Kurdistanê re, rihê welatparêziyê li gel wê çêbû. Keça wê Jiyan Rustem tev li refên tevgerê bû û li rojhilatê Kurdistanê şehîd bû. Dayika Sebah li ser keça xwe û azarên salan ên gelê kurd kilam çêkirin û di minasebetan de gotin. ŞEHBA

Dikarî Biecibînî