Qeyûmê Bêgirê tehemûla navê Eyşe Şanê nekir

Qeyûmê Bêgir a Wanê piştî ku li şaredariyê hate tayînkirin, weke karê destpêkê deriyê Pirtûkxane û Mêvanxaneya Jinan a Eyşe Şanê girt. Hevşaredara Bêgirê ya ji peywirê hatiye girtin, endamên Meclisa Şaredariya û hunermendan bertek nîşan dan û diyar kirin ku qeyûm tehemûla çand û zimanê kurdî nakin

Di hilbijartina xwecihî ya 31’ê adara 2019’an de Partiya Demokratîk a Gelan (HDP) li navçeya Bêgirê ya Wanê bi ser ket. Hevşaredarên Bêgirê Leyla Balkan û Yilmaz Şalan di 6’ê kanûna 2019’an de hatin binçavkirin û ji peywirê hatin girtin. Piştre jî li şûna hevşaredaran, qeymeqamê Bêgirê Erkan Savar weke qeyûm hate tayînkirin. Hevşaredar Şalan di 9’ê kanûnê de hate girtin û Balkan jî hate berdan.

Qeyûmê Bêgirê weke karê destpêkê Pirtûkxane û Mêvanxaneya Jinan a Eyşe Şanê girt. Têkildarî mijarê endamên HDP’î yên Meclisa Şaredariya Bêgirê axivîn. Der barê mijarê de endama Meclisa Şaredariya Bêgirê û cîgira serokê giştî ya Partiya Însan û Azadiyê (PÎA) Menîce Rumeysa Gulmez da zanîn ku qeyûm hefteyek piştî ku hate tayînkirin, pirtûkxane û mêvanxane girt û wiha domand: “Bi van kiryaran dixwazin hemû xebata me li ber çavê xelkê bidin jibîrkirin. Li me zilm û neheqiyeke mezin tê kirin û em dixwazin ev zilm bi dawî bibe. Vekirina pirtûkxane û mêvanxaneyê bi navê Eyşe Şanê bi piraniya dengan û bi erêkirina qeymeqamtiyê hatiye vekirin.”

Hevşaredara Bêgirê Leyla Balkan ku ji peywirê hatiye girtin jî got ku heta niha ji bo girtina mêvanxane û pirtûkxaneyê tu sedem nehatine nîşandan. Balkan da zanîn ku rêbaza qeyûman a vê serdemê ew e ku hemû cihên kurdewar bigirin.

Hunermend Şêrko Kanîwar jî destnîşan kir ku qeyûm dixwaze bi vî rengî huner, ziman û bîra hunera kurdî di nava civakê de birizîne, bihelîne û wiha domand: “Mîrateya çand û hunera kurdî bi hunermendên weke Eyşe Şan dijî. Eyşe Şan navê çand û hunera kurdî ye. Daxistina tabelayê û girtina vî deriyi bêtehamuliya li dijî hunermend û hunera kurdî ye. Astengî û qedexeyên li ser ziman, çand û hunera kurdî ji 20 sal berê xirabtirin. Niha li ber çavê hemû kesî tabelayên kurdî dadixînin. Dixwazin kurdan bitirsînin lê dê negihijin armanca xwe.” WAN