Seta ‘Stranên Arşîva Radyoya Erîvanê’ hate çapkirin

Setek pirtûkan a ‘Stranên Arşîva Radyoya Erîvanê’ ku ji 4 cîldan pêk tê hate çapkirin. Di pirtûkan de 915 gotinên stran û analîzên notayên wan hene

Kurdisches Musîk –und Kulturerbe E.V. (KMK) û Deutsch Kurdisches Kultur Institut setek ji 4 pirtûkên ‘Stranên Arşîva Radyoya Erîvanê (Rîtmîk)’ pêk tê çap kir. Berhevkarî û deşîfreya tekstan hunermend Cewad Merwanî kiriye. Di seta pirtûkan de 915 gotinên stranan û notayên wan hene.

Cara yekemîne ku stranên dengbêjan ên serbest hatine notekirin. Her stran di hêla akademîk de analîza wê hatiye kirin ango meqamê (hawê) stranan, terzê stranan ên rîtmîk jî pîvan û usûlên stranan yek bi yek hatiye nivîsîn.

Pisporê muzîkê (muzîkolog) Weysî Varli deşîfrasyona duyem, kontrol, sererastkirin û analîzên stranan kiriye. Nivîskar Serwet Denîz jî redeksiyona pirtûkan kiriye. Deşîfrasyona yekem a gotinên stranan (notasyon) jî Evren Koç û Şiyar Ayaz kirine. Nivîskar Mehmet Çakmak jî edîtoriya setê kiriye.

Weysî Varli anî ziman ku hunermend Cewad Merwanî beriya 8 salan berhavkariya van stranan ji wî re şandiye û wan jî wek lijneyekê, di nava 8 salan de ev xebat bi dawî kirine.

Seta van pirtûkan li Stenbolê û ji ewil jî ji bo Ewropayê hatiye çapkirin û şandin. Her wiha Weysî Varli diyar kir ku seta van pirtûkan li Amedê jî li rêxistinên civakî yên sivîl û saziyên medyayê belav kirine. Varli got ku seta pirtûka ji bo Tirkiye û Kurdistanê dê di siberojê de werin çapkirin û li pirtûkfiroşan werin belavkirin. Varli dibêje xebatek girîng e û ew ê xebatên xwe yên bi vî awayî bidomînin. AMED