aram

Iraq baregehên leşkerî yên biyanî qebûl nake

Serokwezîrê Iraqê Adil Ebdulmehdî aşkera kir ku ew li ser xaka Iraqê ti baregehên leşkerî yên biyanî qebûl nakin

Wezîrê Parastinê yê DYA’yê yê bi wekalet, Patrîk Şanahan serdana Bexdayê kir û li gel serokwezîrê Iraqê Adil Ebdullmedî civiya. Piştî hevdîtinê Ofîsa Serokwezîriya Iraqê têkildarî hevdîtinê daxuyanî da.

Li gorî daxuyaniyê, Patrîk Şanahan û Adil Ebdulmehdî, pêşxistina pêywendiyên navbera her du welatan, şerê li dijî terorê û geşedanên herêmî guftûgo kirine.

Di daxuyaniyê de tê gotin ku Adil Ebdulmehdî ji Wezîrê Parastinê yê Amerîkayê re gotiye: “Em razî nabin ti binkeyên biyanî li ser axa Iraqê hebin. Biryara Iraqê serxwebûn e, nakeve jêr tu ezmûn û destwerdana tu aliyekê. Iraq jî vekiriye di rûyê welatên derdorê yên erebî û herêmî de. Li ser pêwendî û hevkariyan bi israr e ku xizmeta berjewendiyên iraqiyan û bihêzkirina vejandin û aramiya gelên navçeyê bike.”

Wezîrê Parastinê yê DYA’yê yê bi wekalet, Patrîk Şanahan jî di vê hevdîtinê de aşkera kiriye ku welatê wî şanaziyê bi pêwendî û hevkariya li gel Iraqê dike. Şanahan teqez kir ku erka hêzên Amerîkayê, perwerdekirina hêzên Iraqê û piştevanîkirina hêzên Iraqê û ji holê rakirina DAIŞ’ê ye.

Ji derveyî navend û baregehên leşkerî yên Amerîkayê, gelek navend û baregehên leşkerî yên dewleta tirk jî li başûrê Kurdistan hene. Li gorî destûra Iraqê pêwîst e Iraq tevahî sînorê xwe biparêze û rê nede ti hêz sînorê wê derbas bike. BEXDA

Dikarî Biecibînî