Di lehiya li Japonyayê de herî kêm 55 welatî mirin

Li Japonyayê ji ber lehiyê herî kêm 55 welatiyan jiyana xwe ji dest dan. Rayedarên hikûmetê di asta herî jor de welatî hişyar kirin

Navenda Nûçeyan |

Japonya ji ber şert û mercên nebaş ên hewayê di nava metirsiyê de ye. Li herêmên navîn ên welêt baraneke dijwar dibare. Saziya meteorolojiyê li herêmên çiyayî yên Gîfû û Naganoê di asta herî bilind de hişyarî ragihand.

Rayedarekî Saziya Meteorolojiyê ya Japonyayê têkildarî mijarê axivî û got: “Barana li van herêman dibare beriya niha kêm caran hatiye dîtin.”

Li girava mezin Kyûshû ku li başûrê rojavayê welat e, ji sibeha şemiyê ve lehî rabûye. Ji ber lehiyê û şemitîna erdê ji dawiya hefteyê ve herî kêm 55 kesan jiyana xwe ji dest dan. Fikar hene ku bîlanço girantir bibe. Hîn derdora 10 kes jî winda ne.

Li herêmên ku lehî lê rabûye tîmên rizgarkirinê yên ji 80 hezar kesî ketine nava liv û tevgerê. Ji 1.4 milyon mirovî hate xwestin ku malên xwe biterikînin. Baran ji roja çarşemê ve li beşeke mezin a Kyûshûyê rawestiya.

Dikarî Biecibînî