Li Şirnexê berfê 7 metre derbas kir

Navenda Nûçeyan

Li Şirnexê li gelek herêman berfê 7 metre derbas kir. Ji ber berfa zêde rê hatin girtin û ceyranên gelê herêmê qut bû. Ji ber berfê stûn û têlên ceyranê jî di bin berfê de man

Li gelemperiya bakurê Kurdistanê îsal berfeke zêde bariya. Yek ji bajarên bakurê Kurdistanê ku herî zêde berf lê bariya jî, Şirnex bû. Bêguman berfê li Şirnexê herî zêde li herêmên çiyayî lê kir û bandoreke neyînî li ser jiyana gelê herêmê kir. Berf, li hinek gundewarên Şirnexê 7 metre derbas kir û heta ku stûnên ceyranê jî di bin berfê de winda bûn.

Barîna zêde ya berfê, ger gotin di cih de be jiyana gelê herêmê serobin kir. Bi vê yekê re jî ceyrana gel qut bû, nexweş nekarîn xwe bigihînin nexweşxaneyan û gel nikare pêdiviyên xwe yên bingehîn bi cih bîne.

Ji bo leşkeriyê dixebitin

Şîrketa taybet a Dîcle Elektirîk ku divê pirsgirêka ceyranê ya gel çareser bike, ji gel zêdetir li pey daxwazên leşkeran ketiye. Hat zanîn ku xebatkarên Dîcle Elektrîkê ji bo ku ceyran bi awayekî bênavber bigihîje baregehên leşkerî yên li derveyî sînor û li cihên çiyayî, bênavber dixebitin.

Demsala bêceyraniyê

Hêjayî bibîrxistinê ye ku li bakurê Kurdistanê bi taybetî jî li Serhed û Botanê her sal gelek berf dibare. Ji ber berfê rêyên ku gundan bi hev ve û bi navendên bajar ve girê didin tên girtin û carna bi mehan girtî dimînin. Mirov dikare demsala zivistanê bi taybetî jî li gundewarên Bakur, weke demsala bêceyraniyê jî pênase bike.

 

 

 

 

 

 

 

 

 

 

Dikarî Biecibînî