Ji bo xwenûkirina daristanên Amazonan 100 sal jî têr nake

Navenda Nûçeyan

Şewitîna bi sed hezaran hektar daristanên Amazonê ku dema dawî rû da, di rojeva cîhanê de ye. Darên ku hatine şewitandin an jî talankirin ji bo karibin ji nû ve şîn bên û xwe nû bikin pêwîstî herî kêm bi 100 salî û jê zêdetir heye

Ji Navenda Lêkolînên Hawirdorê ya Helmholz a li Leipzigê Rico Fischer ji kovara Spiegelê re axivî û bal kişand ser zirara mezin a şewata li Amazonan û tevahiya daristanan.

Rico Fischer ragihand ku pirsgirêka herî mezin a şewatan ew e ku ji ber mirovan rû didin û destnîşan kir ku şewatên bi vî rengî li dijî eko sîstemên hesas pirsgirêkeke girîng e.

Rico Fischer destnîşan kir ku tevî qutkirina daran ji bo çandinî ya ji endustriyê, her wiha guhertina avhewayê jî eko sîstem gelekî betilandiye û wiha domand: “Di demeke kurt de rêjeyeke bilind a karbondîoksîtê li atmosferê belav bûye. Amazon qada herî mezin a dinyayê ye ku nahêle karbondîoksît li atmosferê belav bibe.”

Rico Fischer anî ziman ku bi germahiya global re wê guhertina avhewayê Amazonan bêhtir germ bike, bi vî rengî hişk bike û wiha pêde çû: “Tevî vê yekê hejmara şewatan zêde dibe û bi vî rengî gaza bi zirar dibe ku hîn bêhtir li atmosferê belav bibe.”

Her wiha Rico Fischer destnîşan kir ku xwenûkirina daristanên baranê dibe ku zêdeyî 100 salî bidome û got ku li daristanên Amazonê yên hatine birîn dibe ku ev dem hîn bêhtir dirêj bidome.