Heskîf di bin avê de, sergoya xwe li ser avê hiştin

Dewleta tirk bi Bendava Ilisuyê re warê dîrokî Heskîf di bin avê de hişt. Niha jî warê dîrokî Heskîf di bin avê de û li ser avê jî sergoya dewleta tirk maye

Piştî Bendava Ilisuyê ya li ser çem û rûbarên Dicle, Botan, Xerzan, Kezer û Basûr hate avakirin, ji ewil pêşî li van çeman hate girtin û bi vê yekê re bi dehan gund di bin avê de man. Hem gund, hem zeviyên çandiniyê û hem jî warên dîrokî û çandî di bin avê de man. Piştî her der bû gola avê, warê dîrokî Heskîf jî di bin avê de ma. Piştî ku Heskîf di bin avê de hate hiştin jî, li şûna wî warê dîrokî her dever bû sergo.

Li qada hemberî Heskîfa nû li ser rêya ketina Heskîfa berê û Kercewsê, komên çop bala mirovan dikişîne. Ji bo çopa li qiraxê avê kom bûne bê paqijkirin heta niha rayedarên herêmê tu xebat nekirine.

Nûnerê Hewldana Jiyandina Heskîfê Ridvan Ayhan ji MA’yê bi Metîn Yoksu re axivî û bang li rayedaran kir ku çop kom bikin da ku zindiyên li herêmê ji talûkeyê rizgar bibin. Ayhan diyar kir ku hemû warên dîrokî di bin avê de hatine hiştin û wiha domand: “Ev warên dîrokî tev ketin bin avê. Bi bendavê re dîrok winda bû. Dîrok çû û çop hat. Her ku çop zêde bibe sewal û zindiyên li vir jî dê bimirin û tune dibin. DSÎ û Şaredarî kî berpirsiyar be divê bi lez çopê kom bikin û erka xwe pêk bînin.” ÊLIH

Dikarî Biecibînî