Li Stenbolê polîsan tecawizê jineke biyanî kir

Li Stenbolê polisên tirk tecawizê jineke biyanî dikin û tevî giliya jina ku rastî tecawizê tê jî destpêkê derbarê polîsan de tu tişt nayê kirin. Lê piştî ku bûyer tê bihîstin polisên eleqedar tên girtin

Polisên tirk ku her roj bi pêkanînên xwe yên zayendperest dikevin rojevê, li Stenbolê careke din bi bûyereke vî rengî ketin rojevê. Derket holê ku polisên tirk ên bi navê Şeref Şik û Îsmaîl Kok di 15’ê cotmeha 2018’an de  li Stenbolê jina bi navê I.K. (27) ku ji Ozbekistanê ye, bi darê zorê ji taksiya lê siwar bûye wê peya dikin û li wesayîta xwe ya polîsan siwar dikin. Her du polîs piştî ku di wesayîtê de tecawizê I.K. dikin û hezar û 400 TL pere bi darê zorê jê digirin, wê ji wesayîta xwe peya dikin û ji cihê bûyerê dûr dikevin

Jina ku rastî tecawizê polîsan tê ji bo gilîkirinê diçe Qereqola Polîsan a Aksarayê ya Şehîd Vedat Ulusoy û bi polîsa bi navê Y.S. re hevdîtin dike. Lê polîs Y.S. bi hinceta polisê tecawizkar poşman e bi gotina ‘Miraq neke dê ez ê cezaya wî bidim, êdî nêzî te nebe. Dema nêzî te bibe li min bigere’ gilîkirina I.K. derbasî qeydan nake. Her wiha bi heman hincetê komîsera E.S. jî gilîkirina jina ku rastî tecawizê tê, derbasî qeydan nake. Her wiha amirê Midûriyeta Navçeya Fatîhê A.B. jî li gel ku têkildarî bûyerê tê agahdarkirin jî ji bo lêkolînkirina bûyerê tu ferman nedaye.

Hevaleke jina ku rastî tecawizê tê, piştî rojekê ji bo polîsên navê wan di bûyerê de derbas dibe çi ceza hatiye dayîn, diçe Qereqola Polisan a Aksarayê ya Şehîd Vedat Ulusoy. Piştî vê lêpirsînê dertê holê ku haya tu rayedarên qereqolê ji bûyerê tune ye. Piştî vê yekê îfadeya I.K. ji nû ve tê girtin û I.K. giliyê komîserên ku peywira xwe bi cih neanîne jî dike. Piştî vê yekê polisên bi navê Y.S., E.S., A.B., Şeref Şik û Îsmaîl Kok tên binçavkirin. Polîs Şeref Şik û Îsmaîl Kok ji aliyê dadgehê ve tên girtin û polîsên din jî bi şerta kontrola edlî tên berdan û derbarên wan de doz tê vekirin. STENBOL

Dikarî Biecibînî