Jinan li dijî tecrîdê li ber Nûnertiya NY’ê dest bi çalakiyê kir

Li ber Nûnertiya Neteweyên Yekbûyî (NY) ya li Hewlêrê ji bo rakirina tecrîda girankirî ya li ser Ocalan, bi pêşengiya Meclİsa Îştarê greva birçîbûnê dest pê kir

Endamên Meclisa Îştar a Wargeha Penabaran a Şehîd Rûstem Cûdî (Mexmûr) ji bo balê bikişînin tecrîda li ser Rêberê Gelê Kurd Abdullah Ocalan serdana Nûnertiya Neteweyên Yekbûyî (NY) ya li Hewlêrê kirin. Jinan piştî serdanê li ber Nûnertiya NY’ê li dijî tecrîdê dest bi greva birçîbûnê kirin û dê her 5 rojan carekê çalakî were dewrgirtin.

Endama Meclisa Îştar a Mexmûrê Leyla Arzû Îlhan beriya destpêkirina çalakiyê daxuyanî da. Îlhan diyar kir ku dê ji niha û pê de li ber Nûnertiya NY’ê ya li Hewlêrê li dijî tecrîdê dest bi greva birçîbûnê bikin û wiha got: “Divê sînorek ji dagirkeriya dewleta tirk a ku rojane li başûrê Kurdistanê pêk tîne were dayîn. Em piştgiriya welatiyên Behdînan jî dikin. Divê li hemû bajaran weke Şêladizê li dijî dagirkeriyê serhildan pêk werin.” HEWLÊR