Jin bi mijara ‘Jin, koçberî û penaberî’ civiyan

Jinên ewropî û koçber bi mijara ‘Jin, koçberî û penaberî’ hatin cem hev û gotin ku li dijî her cure cihêkariyê divê jinên cîhanê têkoşînê geş bikin

Ji hêla Marche Mondîal des Femmes (Meşa Jinan a Cîhanê) ve li Cevnevreyê ya Swîsreyê jin li Maîson des assocîatîonsê bi mijara ‘Jin, koçberî û penaberiyê’ hatin cem hev. Ji Swîsre, Ewropa û tevgerên jinan ên koçeran bi sedan jin hazir bûn.

Di kombûna jinan de hate gotin ku jin ji ber şer, sedemên polîtîk, hejariyê, tundî, zexta navmalî û gelek sedemên bi vî rengî ji welatên xwe dûr dikevin û hat diyar kirin ku ev jin hem li ser rêya penaberiyê hem jî li welatê ku hatine tim cihêkariyê û tundiyên cur be cur li ser wan tê kirin.

Di axaftinan de hat destnîşankirin ku gelek jin li welatê ku hatine ji ber statûyek wan çênabin mexdûr dibin û wiha hat domandin: “Hebûna destûra rûniştinê ya jinan dibe sedema ku zêdetir keda wan were xwarin û li karên bê ewle bixebitin.”

Nûnerên saziyên jinan dan zanîn ku polîtîkayên mîlliyetgirî û populîst ku li Ewropayê geş dibe her roj dijminatiya li biyaniyan geş dikin û diyar kirin ku li Ewropayê ji bo têkoşîna arîşeyên ku jinên koçber li Ewropayê dijîn divê tora hevgirtinê ya xurt were avakirin.

Her wiha li ser navê Tevgera Jinên Kurd jî di kombûnê de têkoşîna azadiyê ya jinên kurd û destkefiyên wê hatin destnîşankirin, girîngiya têkoşîna rêxistinî ya jinên cîhanê hate bibîrxistin û hate gotin ku yekitiya bi reng û hêza jinan bêyî ku bi derengî bikeve divê were avakirin. CENEVRE