Li Meksîkaye jin dê greva neteweyî pêk bînin

Meksîka xwe ji bo 9'ê adarê greva mezin a li dijî tundiya li ser jinê hazir dike. Serokkomar û endamên kongreyê jî bi daxuyaniyên xwe destek dan greva jinan a neteweyî

Navenda Nûçeyan |

Kolektîva femînîst a bi navê Brujas del Mar ku li eyaleta Veracruz a li rojhilatê Meksîkayê derketî holê, li ser tevnên sosyal hewldana girevê da destpêkirin. Banga grevê ya ji bo 9’ê Adarê, bi dirûşma ‘El nueve nînguna se mueve (9 kes tevnagerin)’ hate kirin.

Serokkomar Andres Manuel Lopez Obrador di daxuyaniya çapemeniyê de wiha got: “Bila jin çalakiyan bikin, ev heqê wan e, azad in. Hikûmeta me heqê lihevnekirinê mîsoger dike.” Her wiha Serokkomar diyar kir ku tercîha xwe li ser grevê kirine dê zext li ser wan neyê kirin.

Li gorî daneyên fermî li Meksîkaya 2019’an 1.006 femînîsîd (kuştina tenê bi sedema ku jin in) çêbûn. Dema ku mirov dide ber sala 2015’an ji sedî 136 zêdetir bûye. Lê daneyên fermî rastiyê nabêjin. Li gorî rêxistinê jinan bîlanço pir girantir e.

Beriya bi demeke kurt jineke 25 salî ji hêla hevalê wê ve bi rengekî hovane hate kuştin. Keçeke 7 salî jî ji hêla gelek kesan ve bi îşkeneyê hate kuştin. Ev du kuştinên dawî bû sedema pêla protestoyan.

Şaredarê paytext Meksîkoyê Claudîa Sheînbaum ferman da saziyên bi ser şaredariyê ve û xwest ku zext li ser wan jinan neyê kirin ku wê grevê bikin.

Her wiha organên edlî, senator û parlamenteran jî dîrektîfên wiha dan. Zanîngehên dewletê û yên taybet jî ragihandin çi peywirdar û çi jî xwendekar bin ji bo ku tev li grevê bûne dê tu ceza li wan neyê birîn.

Her wiha yek ji mezintirîn medyayê Televîsa jî roja înê bi daxuyaniyeke niviskî ragihand ku xebatkarên wan azad in ku tev li grevê bibin û ji hêla pîşeyî ve ev ê tu encamê ji bo wan neyîne.

Dikarî Biecibînî