Çalakîya Dayîkê Şemeyan dewam kena

Çalakîya hewteyo 700. û hewteyo 701. ya Dayîkê Şemeyan ke her hewte seba perskerdişê aqubetê merdimanê xo yê vînîbîyayeyan Rasteyê Galatasarayî yê Stenbolî de arê benî de astengî virazîyabî û polîsî bi fermanê Wezîrê Karê Zerre Suleyman Soyluyî hêrişê çalakgeran kerdbî. Sereka Şubeyê Stenbolî ya Komeleya Heqê Merdiman (ÎHD) Gulseren Yolerî û kênaya Fehmî Tosunî ke 19ê teşrîna verêne ya 1995î de binê çiman de amebî vînîkerdiş Besna Tosune reaksîyon nîşan dayî qedexekerdişê çalakîya Dayîkê Şemeyan.

Yolerîye qiseykerdişê xo de daye zanayîş ke qedexekerdişê çalakîya Dayîkê Şemeyan teberê qanûno bingeyî, pêkerdişê mîyanneteweyî û îçtihadê Mehkemeya Heqê Merdiman ya Ewropa (DMME) yo û wina dewam kerde: “Badê hêrişê polîsan Soylu û verfekê partîyê siyasî îzehet dayî. La îzehetê ke ameyî dayîş û sebebê qedexekerdişê ke ma rê ameyî vatiş yewbînan ra cîya cîyayî. Rewşa OHALî de daxî çîyêk winasî çin bî. Ma baş zanê ke ma heqlî yî. Astengî şaş î. Ganî fek qedexeyan ra bêro veradayîş. Heta ke dewlete fek nê şaşîyan ra vera nêda, do çalakîya Dayîkê Şemeyan dewam bikera.”

Dewlete sucdaran pawena

Besna Tosune zî bale ante çalakîya Dayîkê Şemeyan ser û wina va: “Qedexekerdişê çalakîya Dayîkê Şemeyan nîşan dana ke huqûq çin o. Wezîfeyê dewlete vînayîş û muhakemekerdişê sucdaran o. La îdarekarê dewlete îzehetê xo de sucdaran pawenî û înan reyde gêrenî. Heta ke vînîbîyayeyê ma nêrî dîyiş û kerdoxî nêrî muhakemekerdiş, têkoşînê ma do dewam bikero. Rasteyê Galatasarayî vîrî welatî yo.” STENBOL

Dikarî Biecibînî