Rejîm tehemulê waştişan nêkeno

Seke yeno zanayîş çend rojî verê cû bi hezaran karkerê ke înşaatê Rasteyê Teyarayan yê 3. yê Stenbolî de xebitîyayênê, seba ke şertanê hîna başan de bixebityî, fek karî ra veradaybî. Sereka Pêroyî ya Partîya Kede (EMEP) Selma Gurkan, Parlementera Partîya Demokratîke ya Şaran (HDP) Tulay Hatîmogullari û Verfekê Partîya Keskan û Ameyoxê Çepî Nacî Sonmezî reaksîyon nîşan dayî tewqîfkerdişê karkeran.

Hatîmogulariye destpêkê qiseykerdişê xo de wina va: “Waştişê karkeran waştişê merdimîye bî û cok ra çalakî viraştî. Şert û mercê karkeran zaf zehmetin o û nêşênî bixebetî. Tewqîfkerdişê karkeran kovîtî yo. Tirkîya krîzî reyde rî bi rî ya. Rejîmê yew kesî seba ke xo bipawo, tehemulê talebanê şenikan daxî nêkeno.”

Gurkane qiseykerdişê xo de va ‘Seserara 21î de karkerî nê şert û mercan de xebetîyayêne’ û wina dewam kerde: “No eyb o. AKP her tim hetgiranê xo paweno. Eke muhakemekerdiş bibo, ganî îqtîdarê siyasî bêro muhakemekerdiş. Ma tewqîfkerdişê 24 karkeran şermizar kenî.”

Sonmezî qiseykerdişê xo de va: “Tewqîfkerdişê karkeran qirkerdişê seserra 21î yo. îqtîdat hêrişê çalakîya Dayîkê Şemeyan daxî keno. Êdî mahkeme goreyê îqtîdarî qeraran dana. Tena şermizarkerdiş qîm nêkeno, ganî heme kesî vera îqtîdarî de heqê xo bipawî.” STENBOL

Dikarî Biecibînî