Kerdoxê ewilî yenî nimitis

 

 

 

 

 

 

 

Avûkatê hedîseyê 6-8ê Teşrîna Verêne Adnan Erolî dîyar kerd ke kerdoxê ewilî yenî nimitiş û muhakeme sey kayê tîyatroyî yo û va: “Muhakeme merdimê ke taxe de ronişenî ra yew kerd sucdar û yew zî kerd muştekî.”

Seke yeno zanayîş serra 2014î de DAIŞ hêrişê Kobanî kerdbî. Tirkîya û xeylê cayê dinya de no hêriş ame protestokerdiş. Polîs û leşkerî bi çekan hêrişê merdiman kerdbî û netîceyê hêrişê polîsan û endamê HUDA-PARî de 46 kesî cuya xo vînî kerdbî. No tarîx ra dima hedîse sey ‘Hedîseyê Kobanî yê 6-8ê Teşrîna Verêne’ ame binamekerdiş. Hedefê protestokerdişan o bî ke hêriş û qetlîyamanê DAIŞî bêro asteng kerdiş. Vatişê Serekkomar Erdoganî yê ‘Kobanê ha kewte û ha keweno’ rayapêroyî de hêrsêko gird awan kerdbî. No vatiş û nizdîbîyayîşê hukmatî bî sebeb ke şar vejîyo rasteyan.

Nê cayan ra yew zî bajarê Dîlokî yo û 5 kesî ewja de amebî qetilkerdiş. Taxê Vatan, Beydîllî, Beybahçe, Karayilan, Guzelvadî û Firatî ke tede kurdî herîkîyabî kuçeyan, bibi hedefê polîs, leşker û komê nîjadperestan. Hedîseyan de Suleyman Balci (15), Sevgî Alici (16), Omer Uçaker(27), Şahîn Dogan (27) û Musa Bayramî (26) merdî û xeylê kesî zî birîndar bibi.

Serra 2014î de tehqîqat ame destpêkerdiş û 11 kesan rê doze ame akerdiş. Heme kesê sucdarî 8. Mehkemaya Cezaya Giran ya Dîlokî de bi hawayo serbest yenî muhakemekerdiş. Babete ser o Avûkatê hedîseyê 6-8ê Teşrîna Verêne Adnan Erolî qisey kerd.

Kerdox yenî nimitiş

Erolî qiseykerdişê xo de bale ant nimitişê kerdoxê qetlîyamî ser û va: “Kerdoxê ewilî yenî nimitiş. Ma vîdeyoyan de nê kesan yew bi yewe tespît kerd. Vîdeoyan de zaf baş asîyeno ke polîsî mudaxaleya hêrişê taxê kurdan nêkerdî. Vîdeoyan de merg û kiştiş nêasîyeno. La kesê ke destê înan de dar, çek, sator û kardî estî, asîyenî. Ganî nê kesî bi sucî cînayetî bêrî muhakemekerdiş. La bi qanûnê 6136î yenî muhakemekerdiş û beraet kerdî. Bi hezar kesî sewbîna taxan ra ameyî û hêrişê kurdan kerdî. tena seba formalîte 5-10 kesî ameyî muhakemekerdiş û beraet kerdî.”

Erolî qiseykerdişê xo yê peyênan de wina va: “Ma wazenê kerdoxê raştî bêrî muhakemekerdiş û cezakerdiş. La aşkerayo ke do muhakeme goreyê edaletî hereket nêkero. Kesê ke nê 5 kesan kiştî, sewbîna taxan ra ameyî. Kerdoxê nê kesan hema zî nêameyî aşkerakerdiş.” DÎLOK

Dikarî Biecibînî