Mesele bi hepskerdiş çareser nêbeno

Paştîdayîşê grevê Leyla Guvene zêde bena. Şarê Colemêrgî paştî dano Guvena ke zîndan de seba wedartişê tecrîdê serê Ocalanî grevê vêşanîye de ya. Hemwelatijan vatî: “Waştişê Guvene waştişê ma pêrunan o. Ganî tecrîdê serê Rayberê ma bêro wedartene.”

Nizdîyê 2 serrî yo ke Girawa Îmrali ra ti xebere nîna girewtiş û na rewşe ver etirîyayîşê şarî her ke şono giranêr beno. Hemsereka Kongreya Komela Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene seba wedarnayîşê tecrîdê serê Rayberê Şarê Kurdî Abdullah Ocalanî 8ê teşrîna peyêne de grevê vêşanîye daye dest pêkerdiş û çalakîya Guvene dewam kena.

Hemwelatijanê Colemêrgî yê ke qisey kerdî, ardî ziwan ke Guvene parlamenter û îradeyê înan a û ê kîşta aye de yê. Derheqê babete de hemwelatîyê bi nameyê Fatma Turane, Necmetîn Acarî û Îsmaîl Keskînî qisey kerdî û dîyar kerdî ke ê piştî danî grevê Leyla Guvene.

Ganî tecrîd bêro wedartene

Hemwelatijan ra Fatma Turane vist vîrî ke Guvene bîlaheq zîndan de yena tepiştene û va: “Ma çalakîya Guvene rê wayîr vejîyenî. Weçînayîşî ser a 6 mengî ravêrtî ma hema parlamentera xo nêdîya. Ma wazenê ke parlamentera ma cayê ma de bo. Waştişê Guvene waştişê ma pêrunan o. Ma seba weşîya Birêz Ocalanî qisewet kenî. Ganî tecrîdê serê Rayberê ma bêro wedartene.”

Hepskerdişê kurdan çare nîyo

Necmetîn Acarî zî çalakîyê paştîdayîşê Guvene ardî vîrî û va: “Ganî tecrîdê serê Birêz Ocalanî cade bêro wedartene û meseleyê kurdan bi aşîtî bêro halkerdene. No mesele bi hepskerdişê kurdan çareser nêbeno. Şarê kurdî do tim bi xoverdayîşî cewab bido.”

Ganî her kes wirzo lingan ser

Îsmaîl Keskînî zî Ocalan sey îradeyê bi mîlyonan name kerd û wina domna: “No tecrîdo ke serê Birêz Ocalanî de yeno domnayene, ma esla qebûl nêkenî û çalakîya parlamentera xo Leyla Guvene silam kenî. Waştişê Guvene waştişê ma yo. Ganî heme merdimîye seba wedarnayîşê tecrîdî wirzo lingan ser. Tecrîd sucê merdimîye yo. Coka çalakîya Guvene zaf bierj a.” COLEMÊRG

Dikarî Biecibînî