Seba Leyla Guvene vengdayîşê bi hîsdarîye!

 

Parlamenterê HDPyî yê Wanî Murat Sarisaç û Muazzez Orhane vat ke ganî çalakîya Leyla Guvene ya ke 55 rojî yê seba wedartişê tecrîdê serê Ocalanî grevê vêşanîye de ya hîna zaf bêro xurtkerdene û seba hîsdarîye veng da

Parlamenteranê Partîya Demokratîke ya Şaran (HDP) yê Wanî Murat Sarisaç û Muazzez Orhane grevê vêşanîye yê Leyla Guvene ke 56 rojî yê dewam keno, tecrîd û polîtîkayê şerî yê hukmatî ercnayî. Parlamenteran vatî tecrîdê serê Rayberê Şarê Kurdî Abdullah Ocalanî ameyoxê şaranê Rojhelato Mîyanênî tehdît keno.

Parlamentere Orhane nê vatî: “Kurdî hemverê polîtîkayanê îmha û înkarî de 40 serrî yê mucadele danê. Birêz Ocalanî çende reyan destê aşitî kerd derg û vernîya mergan girewte. La dewleta polîtîkaya înkar û îmha ca nêverdaye û heme prosesî kerdî xira.”

Orhane dewamê qiseykerdişê xo de nê vatî: “AKPyî dimayo ke dî 7ê Hezîrane de îqtîdar destê ci ra şino şer îlan kerd. AKPyî mutabaqatê Dolmabahçe da hetêk û weçînitişî îptal kerdî. Dima ra zî têkilîya birêz Ocalanî birnaye. Welatê ma hem hetê ekonomî ra û hem zî hetê sîyasîyî ra kewt binê destê rejimê yew camêrdî.

Şar waştişê Leyla Guvene rê wayîr vejîya

Na çalakîya birêze Leyla Guvene hemverê tecrîdê serê Ocalanî de ya. No tecrîd hemverê welatî de û hemverê ameyoxê şaranê Tirkîya de yo. 55 rojî hendî merheleya krîtîk a. Problemê weşîye yê cidîyî dest pêkerdê. Na bêvengîya îqtîdarî nêna qebûlkerdene. Ganî çi kesê ke hetê demokrasî û aşitî de yê na çalakîye rê wayîr vejîyê û paştî bidê ci. Şarê ma bi pratîkê xo ramoto ke ê waştişanê Leyla Guvene rê wayîr vejênê.”

Tecrîd tena bi xoverdayîş şikêno

Parlamenterê HDPyî yê Wanî Murat Sarisaçî zî nê vatî: “Grevê Leyla Guvene qîrîyêka serewedartişî ya. Her çend no veng roj bi roje vila beno zî hewna hîsdarî nêresaya dereceyêka bese. Bicaardişê hukmatê AKPyî kewtê peynîya Qanûnê bingeyênî yê 82yî. Destê ma de nimûneyê Enîs Berberoglu esto. Kurdan rê yewna huqûqî bica anê. Faşîzm ancax bi xoverdayîşê şaran eşkeno bêro rijnayene. Nika vajîyeno ke 90 kes grevê vêşanîye de yo û na hûmare do bibo vêşî. Eke aşitîya komelkî û mendeye yena waştene ganî tavilî tecrîdê serê Ocalanî bêro wedartene.” WAN

Dikarî Biecibînî