Aynura ke Mezgîrî ra ya: Dewij berardiş kenî yê bajaran zî xebetnenî

 

Aynur Gungorena ke dewa Guneşdere ya Mezgîrî de cuyena dîyar kerde ke bajarê metropolan de herinda berardişî de çinîkerdiş zêde bîyo û daye zanayene ke ganî hemverê kulturê çinîkerdiş û cuya rizîyaye de agêrayîşê dewan dest pêbikero

Aynur Gungorena ke dewa Guneşdere yêa Mezgîrî ya Dêrsim de cuyena seba cuya xozayî û berardişî veng daye heme kesan.  Aynur Gungorene qiseykerdişê xo de wina va: “Seba ke bajaran de texrîbatê ekolojî zêde yo, merdimî cuyêka xirab cuyenî û cuya xozayî zî kewena binê gudê kapîtalîzmî.”

Mi têkoşînêko pîl daye

Aynur Gungorene qiseykerdişê xo de îzeh kerde ke bi heywankarî 3 domananê xo daya wendiş û wina dewam kerde: “Ez 17 serrî ya xo de zewecîya ya. Ez hema doman bîya, la barê giran dîyayî milê mi ser. Seba ke çîyê ke ez cuyaya domanê mi nêcuyî, mi têkoşînêko pîl daye. Pêroyê hewldayîşê mi seba wendişê domananê mi bî. 2 domanê mi unîversîte de wendî. Mi 1 lajê xo zî erşawit teberê welatî. Taybet wa domanê kêna biwanî û tena serê xo payanê xo ser de bivinderî.”

Heme çîyê mi organîk î

Aynur Gungorene dewamê qiseykerdişê xo de înan va: “Bajaran de cuye çin a. Merdim heme çîyan amade weno. Raştîyêko winasî esto. Berardişê dewan bajaran de yenî rotiş û xebetnayîş. Zafê çîyê ke bajaran de yenî rotiş horminin î. Cok ra merdimî zaf nêweş kewenî. Dewe wina nîya. Kergê ma estî, biz û sewbîna tewir bi tewir heywanê ma estî. Heme çîyê ma xozayî yî.”

Ganî agêrayîşê dewan dest pêbikero

Aynur Gungorene qisykerdişê xo yê peyênan de wina va: “Wexto ke beno hamnan ma sewze û xele çinenî. Şit, mast, penîr û heme çîyan ez bi xo amade kena. Merdiman ser de koçkerdiş ferz kerdî û bajaran de bi ca bîyî. Nika zî berardişê xozayî ra bêpar manenî. Mi gore êdî eşkenê agêrî dewanê xo û berardiş bikerî. Wa agêrayîşê dewan dest pêbikero.” DÊRSIM