Guvena ke nêeşkena rayra şiro do tewrê tazîye nêbo

MERKEZÊ XEBERAN

Leyla Guvena ke roja 59ine ya grevê vêşanîye ya bêdem û bêagêrayîşî de ya rîyê problemê weşîye ra do nêeşko tewrê tazîyeya maya xo bibo

Ame zanayene hemsereka Kogreya Cimatî ya Demokratîke (KCD) û parlamentera HDPyî yê Colemêrgî Leyla Guvena ke seba wedartişê tecrîdê serê Rayberê Şarê Kurdî Abdullah Ocalanî Zîndanê Tîpê Eyî yê Amedî de 8ê Teşrîna peyêne de dest bi grevê vêşanîye kerdibi do nêeşko tewrê tazîyeya maya xo Cevrîye Guvene bibo.

Goreyê hayîdarîyanê ke avûkatanê Leyla Guvene ra gîrîyayî rîyê problemanê weşîye ra do Leyla Guvene nêeşko tewrê tazîyeya maya xo bibo. Tansîyona Guvene ya ke vizêr şan de kontrolê ci yê weşîye ameyî kerdene 9/7 vejîyaye. Guvene vizêr rixmê nê problemê tansîyone de zî vatibi ke a do tewrê tazîyeya maya xo bibo. La verê raywanîya ke ewro serê sibayî do biameyêne kerdene reyna kontrolî ameyî kerdene. Netîceyê kontrolan de tansîyona berze, bêhalî, viritiş û şîyayîşê dewqe ameyî tesbîtkerdene.

Ame zanayene ke Guvene nêeşkaya rayra şiro û şîretanê avûkatanê ci ra dima Guvene gama peyêne de qerar dayo ke tewrê tazîye nêbo.