Ganî ciwanî elewîtî tesilî bimusî

Kahraman Tanriverdîyo ke kulturê sojî Kizilbaşo ke nêmî serrî yo ke dewam keno rê xizmet keno dîyar kerd ke o bi eşqê elewîtî pîl bîyo û va: “Ma bi cuyayîşî no rayîrî musayî. Ciwanê nikayîn zaf nînê keyeyê cemî. No kêmasîyêk pîl o. Ciwanî hem bi  wendiş û hem zî bi ameyîşê tîya eşkenî no rayîrî bimusî.”

Kahraman Tanriverdîyo (65) ke kulturê sojî Kizilbaşî rê xizmet keno û dewa Çamgazî ya girêdayeyê merkezê Semsûrî de cuyeno xeylê herêmanê Tirkîye gêrayo û xeylê dergahanê ewleyîyan zîyaret kerdo.  Tanriverdîyî her hewte şono Keyeyê Cemî yê taxaYenî Mahalle yê merkezê Semsûrî û semah tepişeno.

Tanriverdîyo ke heta 20 serreyê xo dewe de cuyayo qiseykerdişê xo de wina va: “Aye wextan ma zaf çîyan nêzanayêne. Dewa ma talibê Ocaxê Kureyşan bî. Aye wext Kamber Dede ameyêne dewa ma û pêroyê dewijan odeyêk de arê bîyêne. Ez aye wext doman bîya û domanî zî kinarê ode de bala xo dayêne sohbetan. Ma esîr bîyêne. Badê qedîyayîşê cemî ma yewbînan rê qal kerdêne. Ma pîlanê xo ra elewîtî musayî û bi eşqê elewîtî pîl bîyî.”

Ciwanê nikayîn zaf nînê keyeyê cemî

Tanriverdiyî qiseykerdişê xo yê peyênan de wina va: “Ma dewa Çamgazî ra koçê dewa Karakoçî kerdî. aye wext dewe de sofîyê Kizilbaşî estbî. Cem tepiştêne û xizmet kerdêne. Ez ciwanîya xo de Aço Baba û tepiştişê cemî ra zaf tesîr bîya. Nêmî serrî yo ke no kultur dewam keno. Ez hewl dana ke felsefeya elewîtî bida cuyayîş. Nizdîyê 50 serrîyo ke ez semah tepişena. Her sey semahê xo yê yewir her seah tepiştişî de kewena hîssanê cîya-cîyayan. Ez zaf nêeşkena pay ser de bimana, la na rewşe qet tesîrê xo nêdana semahtepiştişê mi ser. Mi gore no bawerî ra yeno û îtîqatê mi temam o. Ma bi cuyayîşî no rayîrî musayî. Ciwanê nikayîn zaf nînê keyeyê cemî. No kêmasîyêk pîl o. Ciwanî hem bi  wendiş û hem zî bi ameyîşê tîya eşkenî no rayîrî bimusî.” SEMSÛR