Zilm bi ma mekerên cenazeyanê ma bidêne

Keyeyê ke cenazeyê domananê înan Goristanê Xerzanî ra ameyî vetiş 13 aşmî yo ke paweyê teslîmgirewtişê cenazeyanê xo yî. Keyeyî dîyar kerdî ke vetişê cenazeyan bawerî û ehlaqî nîyî û wina vatî: “Êdî bes o ke şima no zilmî bi ma kenî. Cenazeyanê ma bidêne ma”

Seke yeno zanayene dewa Oleka Corî ya Bedlîsî de Goristanê Xerzanî de 267 cenazeyî bê xebera merdiman û keyeyanê înan ameybî vetene û seba tespîtkerdişê kamîya înan erşawîyaybî Dezgehê Tibê Edlî yê Stenbolî (ATK). Vetişê cenazeyan ser ro 13 aşmî derbaz bîyî, labelê vîşêrê 2 cenazeyan hema zî cenazeyî nêdîyayî keyeyanê înan. Keyeyê bînî zî muracatê dozgerîye kerdî û hema zî paweyê cewabê dozgerîye yî. Di rojî verê keyeyê muracatê Dozgerîya Bedlîsî zî kerdî û waştî ke êdî no zilm biqedîyo.

Dayîka Fedekar Turano ke cenazeya ci goristan ra ame vetene Nuriye Turan daye zanayene ke ê bi serran verê cenazeya xo ewja de defin kerdbî û wina va: “Ma têkoşînê teslîmgirewtişê cenazeyanê xo danî. Dîn û ehlaq de cayê vetişê cenazeyan çin o û ehlaqî nîyo. Ma muracatê Dozgerîya Bedlîsî da. Waştişê tena oyo ke ma cenazeyanê xo teslîm bigîrî. Çira no zilmî b ima kenî? Merdeyê ma ra çi wazenî? Wa cenazeyanê ma bidî ma. Ez wazena bizana ke mezelê lajê mi kamî ca de yo. Lajê mi her şewe yeno hewnê mi.”

Kesê ke wina kenî bêwijdan î

Keyeyan ra yew zî keyeyê Abdullah Karabaşî yo. Birayê Karabaşî, Burhan Karabaşî qiseykerdişê xo de waşt ke cenazeya bira xo bigîro û va: “Hesteyê merdimanê merdeyan ra çi wazenî? Ez sena numuneyê gonî Stenbol ra ameya Bedlîsî. Tena waştişêk ma esto, o zî teslîmgirewtişê cenazeya birayê mi yo. Hende wext derbaz bî. Wa cenazeyan bidî ma. Kesê ke wina kenî bêwijdan î.”

Aqûbetê cenazeyan

Pîyê Huseyîn Tekînî ke cenazeya ci ame vetene Şexmûs Tekînî zî tewr peynî wina va: “Mi wextêk derg lajê xo ra xebere nêgirewt. Dıma ra xebere ame ke lajê mi cuya xo vindî kerdo û berdî Goristanê Xerzanî. Ma bi serran cenazeyanê xo gêrayî. Dayîka lajê mi verê ke mezelê domanê xo bivîna cuya xo vindî kerde. Nika ez cenazeya lajê xo gêrena. Vetişê hesteyan bêwijdanî yo. Şar no qebul nêkeno. Ma wazenê aqûbetê cenazeyan bizanî.” BEDLÎS – MA