Sefa Ozturkî: Prosesê peyênan de bi hawayo tewş qala elewîtî yeno munaqeşekerdiş

Merkezê Xeberan

Dedeyê Ocaxê Guvenç Abdalî ra Sefa Ozturkî hesabê xo yê medyaya sosyalî ra mesajêk weşêna û dîyar kerd ke prosesê peyênan de elewîtî bi hawayo cîya cîyan û tewşan yeno munaqeşekerdiş û va: “Kasê ke cuya xo de qet cem nêgirewtî, nêdîyî, nêvindetî dara qala bawerîyêka tewş kenî. Hewl danî ke bawerîyêka tersin awan bikerî.”

Sefa Ozturko ke dedeyê Cemxaneyê Îçerenkoyî yê Komeleya Kulturê Pîr Sultan Abdalî (PSAKD) yê Ocaxê Guvenç Abdalî yo qala prosesê peyênan de qalîkerdişê cîya cîyayan kerd. Ozturkî qiseykerdişê xo de da zanayene ke komel û komeleyê ke tesr tede hakîmîya xo awan kenî de têkilîya merdiman xirab  bena û komelê winasî de sîyasal û sosyalî zî yewbînan ra cîya benî.

Cayêoke laîkî çin bo de azadîya bawerîyan zî çin a

Ozturkî destpêkê qiseykerdişê xo de wina va: “Ters merdiman bêîtîbar keno û vernîya averşîyayîşê merdiman padano. Cayo ke tede ters bibo de heq, huzur û edalet zî çin î. Esasê xo de demokrasî zî çin a. Eke demokrasî çin bo laîkî zî çin o. Cayo ke laîkî çin bo de azadîya bawerîyan zî çin a. Prosesê peyênan de bi vatişanê tewşan qala elewîtî yeno kerdiş.”

Ganî ma tersan reyde bêrî ri bi rî

Ozturkî dewamê qiseykerdişê xo de înan ard ziwan ser: “Kasê ke cuya xo de qet cem nêgirewtî, nêdîyî, nêvindetî dara qala bawerîyêka tewş kenî û pawenî. Atmosferê tersî ra bîyyeyê xo domnenî. Hewl danî ke bawerîyêka cîya awan bikerî. Ê zî zanê ke zuran kenî. Kesê ke deryayê tersî de aslonberî kenî, nêeşkenî baş û raşt bifikirî. Roj bêro roj do nê kenî xo ra bişermayî û mahçup bibî. Seba ameyoxê merdimîye ganî ma tersan reyde bêrî ri bi rî. Bawerîya ke tena ziwan ser de biba, aye bawerî raşt nîya. Bawerîya ma onurê ma ya.”