Cinî do sey Sakîneyan xo ver bidê

Hemsereka HDPyî ya Dêrsimî Ozlem Toprake dîyar kerde ke xoverdayîşê sîyasetmedara kurdan Sakîne Cansiza ke Parîs de ameye qetilkerdene, ramojnaya ke cinî çiqas xurt ê û wina va: “Sakîneye xoverdayîşê xo sey mîras verdaye. Cinî do vera hêrişan de xo ver bidê. Sakîne vernîya ma de bî roşna.”

9ê Çeleyê 2013î de Parîs de hîrê sîyasetmedarê cinî yê kurdan Fîdan Dogan, Leyla Şaylemez û Sakîne Cansize ameyî qetilkerdene. Têkoşînê înan cinîyan rê mîras mend. Sakîne Cansiz 1958î de Dêrsim de ameye dinya. Sakîne badê derbeya 12ê Adara 1971 ra têkoşînê ciwanê şorişgêran rê eleqedar bena. Sakîne dima ra mîyanê kadroyê rayber ê Partîya Karkeranê Kurdistanî (PKK) de ca girewte.

Sakîne yewin kongreya PKKyî yê 27ê Teşrîna Peyêne 1978î de ca girewte. 1979î de Xarpêt de ameye tepiştene û derbeya 12ê Êlule de hepisxaneyê Amedî de bî. Sakîne bi xoverdayîşê xo yê hepisxaneyî bî sembol. Sakîne 1991î de hepisxane ra vejîya, xebata xo bi hawayêke çalak meşna. Sakîne bi taybet girîngî daye têkoşînê cinîyan û cinîyê ke fabrîka de yê rêxistin kerde. Cinîyê ke unîversîte de yê bigîre, heta cinîyê ke fabrîkayan de her kesî dir têkilî da ro. Heto bîn ra kitabê xo yê ke ‘Cuya mi her wext, pêrodayîş bî’ nuşte.

Ma rê bî roşnîye

Hemsereka Partîya Demokratîke ya Şaran (HDP) ya Dêrsimî Ozlem Toprake daye zanayene ke têkoşînê Sakîneye seba cinîyan bîyo hêzêke pîl û va her wext seba înan bîya roşnîye û wina va: “Mar ö ramojna ke ganî xoverdayîş senî bêro dayîş. Sakîne û embazê xo bî sîyê esas ê têkoşînê azadîya cinîyan. Vera kulturê feodal têkoşînêke pîl meşna. Her wext vera şaşî de vinderte û têkoşîn meşna. Sakîneye mîras ma rê verda. Do heme cinî sey Sakîne xo ver bidê, weşik bibê. Coka ma înan sey rayber bivînê û têkoşînê xo bidê cuyayîş. Sakîne temsîlkara xoverdayîşî ya. No xoverdayîş, xoverdayîşê cinîyê Kurdan o.” DÊRSIM