Bi mîlyonan kedkarê Hindistanî hemverê cuya vaye de kewtî grev

Merkezê Xeberan

Bi vengdayîşê federasyonê sendîkayanê Hindistanî des mîlyonan kedkarî hemverê cuya vaye de seba pawitişê heqan kewtî grev.

Bi mîlyonan kedkarê sektorê taybet û kamu bi vengdayîşê 10 sendîkayanê Hindistanî herikîyayî raşteyan û 8-9ê çeleyî de seba protestokerdişê polîtîkayanê hukmatî û cuya vaye dest bi grev kerdî. Sekreterê Pêroyî yê Kongreyê Sendîkayanê Hindistanî Amarjeet Kaurî derheqê babete de îzehetêk da û dîyar kerd ke 200 mîlyon kedkar û karkerî seba 2 rojan dest bi grevê pêroyî kerdî.

Kaurî îzehetê xo de da zanayene ke kedkarî seba protesto kerdişê polîtîkayanê hukmatî yê Partîya Şaranê Hindistanî (BJP) pêroyê welat de dest bi gerevan kerdî û va: “Kedkar û karkerî başkerdişê asayîşê sosyal, ucreto asgarî û vayeya ke welat de bîyo wazenî.”

Kedkarî pêroyê welat kewtî grev

Grev çapemenîya Hindistanî de cayêk zêde girewt û xeylê bajaran de bi hezar kesî dest bi çalakîyanê kuçeyan kerdî. Selahîyetdarê Partîya Komunîstê Hindistanî (Marksist) û sendîkayijo kehen Elamaram Kareemî îzehetêk da çapemenî û va: “Kedkarî pêroyê welat kewtî grev. No hemverê hukmato merkezî û polîtîkayanê şaşî de protestoyêk o.” Hetkarê hukmatî tay cayan de hêrişê çalakgeran kerdî.