Kiştoxê esasî yê ke sîstem awan kerdî yî

Sekretera Cinîyan ya Egîtîm Senî Derya Yulcu dîyar kerde ke o ke akademîsyen Ceren Damare qetil kerdo tena gumanbar Hasan Îsmaîl Hîkmet nîyo, yê ke dişminîyê vera cinîyan awan kerdê zî. Deryaye va kiştoxê esasî yê ke sîstem awan kerdê yê.

Wezîfedara Cigêrayîşê Beşê Zanistî ê Huqûqî yê Asayîşê Komelî Fakulteya Huqûqî ê Unîversîteya Çankayayî Ceren Damar Şenele hetê wendekarê huqûqî Hasan Îsmaîl Hîkmetî ra amî qetilkerdiş. Sekreterê Cinîyan ê Egîtîm Senî Derya Yulcu derheqê qetilkerdişê Cerene û sîstemê bîyaye de qisey kerde.

Deryaye da zanayîş ke şîdetê vera cinîyan zêde bîyê û na rewşe wendegehan de zî vila bîya û wina va: “Dimayê OHALî hetê komelî de şîdet zêde bîyo, aştîya komelî ameya sewîyeya çînbîyayîşî. Tedbîrê asayîşî yê pîl estê la ma cinî zanê ke nê ma nêpawenê. Nê tedbîrê asayîşî tewr zêde sey hacetê şîdet û tersî yenê xebitnayîş.”

Deryaye vatişê Sedat Pekerî o ke seba akademîsyenan xebitnabi sey ‘ma do gonîya înan birijnê’ arde vîr û va tehdîdê vera akademîsyenan bê ceza mendo û no zî şîdet û çimsûrî zêde kerdo. Deryaye wina va: “Şîdet her ca de esto. Ferasetêke erje nêdano kede, zanist û huner î, ferasetêke nê fikran sey xeter vîneno esto. Tirkîya de vera şîdet û qetilkerdişê cinîyan de bêvengîyêke esto. Warê perwerdeyî de êdî fikr nînê munaqeşekerdiş. Cîyabîyayîş sey dişminî yeno vînayîş. Unîversîteyê ke AKP esto îzahatê cidî nêameyî kerdiş. Wazenê reaksîyonê vera şîdetî zî bêveng bikerê.”

Deryaye wina va: “Unîversîteyî goreyê lîyakatî ney, goreyî sadakatî yenê tanzîmkerdiş. No zî zanistî bê asayîş kerd. Wexto ke merdimî ewnîyenê, meydan de kiştoxêke çin o. Kiştox estê. Nê kiştoxî zî mîyanê ma de yê. Bi wedartişê liyakatî perwerde de apeyî virazya. Êdî wendekarî bî muşterî û mamoste zî bî xizmetkarê wendekaran. Yê ke kiştoxan awan kerd no sîstem o.” ANQARA