Rojnameger Metîn Goktepe Cemxane û Şûbeyê Samsunî yê PSAKDî de ame vîrardiş

Rojnameger Metîn Goktepeyo ke wextê taqîpkerdişê xebere de ame tepiştiş û hetê polîsan ra ame qetilkerdiş serrgêra 23. de xeylê cayan de ame vîrardiş. Goktepe Cemxane û Şûbeyê Samsunî yê PSAKDî de ame vîrardiş.

Rojnameger û muxabîrê rojnameyê Evrenselî Metîn Goktepe 8ê Çeleyê 1996î de hetê polîsan ra ke rojnamegerî kerdêne, ame tepiştiş. 1996î de zîndanê Ûmranîye yê Stenbolî de di kesî amebî kiştiş. Goktepe seba merasîmê cenazeyan bişopno şibî Alibeykoyî. Polîsî ewja de destûr nêdanî ke Goktepe merasîmî bişopno. Seba ke Goktepe israr keno, polîsî ci tepişenî û nizdê hezar kesî reyde ey benê Salona Werzîşî ya qezaya Eyûbe. Goktepe ewja de bi perodayiş û îşkenceyê polîsan yeno qetilkerdiş. Komeleya Kulturê Pîr Sultan Abdalî (PSAKD) yê Şûbeyê Samsun û Cemxane de organîzasyonê vîrardişî ame kerdiş û Metîn Goktepe serrgêra qetilbîyayîşê 23. de ame vîrardiş. Vîrardiş bi deqayêk rêzgirewtiş dest pêkerd û sînevîzyon ame temaşekerdiş. Sînevîzyon heyê Baytar û Hetkarê Serekê Şûbeyê Samsunî yê PSAKDî Tuncer Onurî ra ame amadekerdiş û xeylê hîîsin derbaz bî.

Badê qiseykerdişê Onurî rojnamegerê Temsîlkarê rojnameyê Evrenselî yê Samsunî Hasan Koçakî qisey kerd û dîyar kerd ke lazim nîyo ke merdim qala kerdoxan bikero, çimkî heme kes kerdoxan baş zano. Koçakî ra dima zî Serekê Şûbeyê Samsunî yê PSAKDî Cem Sultan Ermişî qisey kerd û da zanayene ke Goktepe tena seba vindetişê xo yê sîyasî vera nê seba bawerîya xo vera zî ame qetilkerdiş. Metîn şorişgerêk bî. SAMSUN