500 esnafê Amedî do derebeyan ronî

Bi seyan esnafê raşteyê Sakarya yê Amedî derebeyanê dikananê xo ronenî. Esnafî dîyar kerdî ke xizmetê cêrzemînan baş nîno kerdiş, rayîr û roşnayê raşte zî xeripîyayî û nînê viraştiş.

Esnafê raşteyê Sakarya yê qezaya Amedî dîyar kerdî ke seba ke xizmetê raşte yê rayîr, kanalîzasyon û cereyanî nîno kerdiş muşterî nînê dikan û do 500 esnafî çalakîya padayîşê derebeyan pê bîyarî. Esnafî dîyar kerdî ke eke waştişê înan pê nêrî do şêrî verê berê Şaredarîya Bajarê Girdî ya Amedî.

Esnadî dayî zanayene ke 5 aşmî verê cû xeta gaza xozayî antî û cok ra rayîr kinitî. Êdî kes nêeşkeno raşte de rayîr şêro. Esnafa cinî Emel Orneke qiseykerdişê xo de wina va: “Ma bi îmkananê xo kerra û xîz rişnayî raşte û her ke varan vareno raşte mîyanê çamirî de maneno. Çamir vera kes nîno. Raşteyê Sakarya aîdê Şaredarîya Bajarê Girdî ya Amedî yo. Karê proje xeylê hîdalek derbaz beno. Esnafî mîyanê zor û xehmetîyê giranan de yî. roke de nizdîyê 20 hezar merdimî tîya ra derbaz benî.”

Qayûm tîmî pesndayîşê xo bi xizmet keno

Esnaf Giyasettin Borayî qiseykerdişê xo de bale ant rewşa raşte û xizmeta şaredarî ser û wina va: “Vatî ‘ma do raşte newe bikerî.’ La herinda newekerdişî de hîna xirab kerdî. Varê çal û herre çin bî. Nika heme ca de çal û çamir esto. Qayûm tîmî pesndayîşê xo bi xizmet keno. Wa bêrî tîya bivînî.”

Xizmet qet çin o

Mehmet Karayilo ke 10 serrî yo esnafî keno û Kazim Donmezî zî wina vatî: “Her ke varan vareno raşte mîyanê çamir de maneno. Esnafî çamir, rayîrê xeripnaye û çinbîyayîşê xizmetî vera do berê dikananê xo padî. Xizmet qet çin o. Ma perîşan bîyî. Eke waştişê ma pê nêrî, ma do şêrî  Şaredarîya Bajarê Girdî ya Amedî.” AMED