Stenbol terk kerde Pulur de bica bîye: Bajar cuya merdiman qedêneno

Neşe Kilinça ke seba şertê giran Stenbol terk kerde û Pulur de bica bîye û wina va: “Bajar cuya merdimî qedêneno. Projeyê ma yê cinîyan esto ke ma Pulur de sera awan bikerê. Her çî baş derbaz bibo ma do bica bîyarê”

Problemê metropolê pîlan tesîrê serê cuya merdiman de keno û hemwelatî seba cuya huzur û xoza xo ver danê. Neşe Kilinça ke bi serran Stenbol de cuyaye dîyar kerde ke înan nêwaştî bajaran de bicuyê û 2011î ra dima ageyrayê Pulur û nika ê zaf kêfweşê.

Piştîdayîşê cinîyan serê lingan de verda

Kiliçe daye zanayîş ke 2011î de hîn probleman cuyaya û wina va: “Lajê mi Pulur de bi. Ez ageyraya verê ci. Mi baxçeyê çaye akerde. Wexto kem a tîya akerde, destê ma de ti sermaye çinbi. Dima ra lajê mi zewecîya û şi Almanya. Ez tena menda. Ez bi xêrê piştîdayîşê cinîyan serê lingan de menda. Şarê Pulurî xeylê piştî da mi. Badê wextêk êdî mi kafe akerde.”

Bajar cuya merdiman qedêneno

Kiliçe dewamê qiseykerdişê xo de wina va: “Hetê ekonomî de nika rewşa mi baş a. Ez Stenbol de xeylê karan de xebetîya ya. Tewr peyîn fîrmaya lojîstîk de xebityaya û nêweş kewta. Bajar cuya merdiman qedêneno. Cinî eşkenê binê heme karî ra vejîyê. Mi no ferq kerd ke Pulur de cinî camêrdan ra tewr xebatker ê. Koperatîf de xebatkarê cinî estê. Verê nê de ma eşkenê hîn çîyê kolektîf bikerê. Nimûneyê projeyê ma yê awankerdişê sera esto.” DÊRSIM