Xabûre: Tepişteyî bi ruhê 14ê Temmuze xover danê

Endama Koordînasyonê KJKyî Dîcle Xabûra ke derheqê grevanê vêşanîye yê ke seba wedartişê tecrîdê serê Ocalanî ameybî destpêkerdene ercnayîşî kerdî vat tepişteyî bi ruhê 14ê Temmuze xover danê.

Endama Koordînasyonê KJKyî Dîcle Xabûra ke roja Îneyî tewrê bernameyê “Rojeva Jin” ê Stêrk TV bîye derheqê averşîyayîşanê Kurdistan û Rojakewtena mîyanêne de ercnayîşî kerdî. Xabûre dîyar kerde ke mucadeleyê şarî yo nikayên manîdar o, la kemî yo û va ‘Ma hendî çi pawenê?’

Xabûre nê vatî: “Şexsê Leyla Guvene de bi çalakîyanê ke zere û teberê welatî de ameyê viraştene nika ra tecrîd veng ameyo vetene û fikir û felsefeya Rayber Apoyî sey toximêk her ca de û zerrîya her kesî de vila bîyo.”

Ma hendî çi pawenê?

Xabûre qiseykerdişê xo wina domna: “Xoverdayîşê Zîlanan û Semayan û cewabo ke înan da dişmenî hîsê înan ê welatperwerî û girêdayîşê înan ê erdê welatî ra ameyêne. No hîs o ke kultur, ziwan û estbîyena Kurdan payra verdano. Tepişteyan bi nê grevan ruhê xoverdayîşê 14ê Temmuze newe ra dayo destpêkerdene. Bi derbeyê 12ê Êlule ame vatene ke Kurdî do hendî nêeşkê sereyê xo berz bikerê. Bi xoverdayîşê zîndanî yê 14ê Temmuze û mucadeleyê şarî tarîxê Kurdan newe ra ame nûştene. Ewro zîndanan de heman ruh xover dano. Ma hendî çi pawenê? Mucadeleyê embazanê ma yê zîndanî hende bîyo berz, ma nêeşkenê ke teber de kemî bimanê.”

Vengdayîşê seba rayraşîyayîşê Parîsî

Xabûre dewam de nê vatî: “Ganî ma qirkerdişanê ke xoverdayîşê xoserîye yê 2015 de ameyî kerdene û xoverdayîşanê ê wextî mekerê xo vîr ra û hîna zaf tewrê mucadeleyî bibê. 19ê Çile de do mîtîngê HDPyî virazîyê, ganî şarê ma hîna xurt tewrê înan bibo. Gama PKK newe awan bi peyê ci de tu hêz çinbi. Ma bi mucadeleyê xo û bedelanê xo resayî ewroyan. Silêmanîye de qedexekerdişê ‘Belgefîlmê Sara’ tu faydeyêk nêreseneno yewîya Kurdan û bicaardişê winayênî xizmetê hêzanê îşxalkaran kenê. Rayraşîyayîşo ke do 12ê Çile de Parîs de virazîyo seba cinîyan zaf muhîm o, ganî şarê ma bi xurtî tewrê nê rayraşîyayîşî bibo.”

Ganî tu hêzo îşxalkar vakurê Sûrîye de memano

Xabûre derheqê qerarê ancîyayîşê hêzanê Amerîka yê Sûrîye de nê vatî: “Hêzo ke roja ewilêne ganî ûca mebîyêne ra ma nêeşkenê vajê ke ti çira xo ancenê. Tena o nê ganî tu hêzêko mîyanneteweyî û tu îşxalkar ûca memano. Ganî tenya cinîyê Kurdî nê cinîyê Ereb, Suryanî, Ermenî û heme cinîyê enternasyonalî hemverê hêzanê îşxalkaran de û polîtîkayanê înan de bi hîsê qesas û kînî vinderê û bikewê mîyanê xoverdayîşêkê topyekunî.”  BEDÎNAN – ANF