Konserê Pinar Aydinlar û Çarnewa qedexe bî

Merkezê Xeberan

Konsero ke do ewro biameyêne kerdiş yê hunermend Pinar Aydinlar û Çarnewa hetê Walîtîya Mêrsînî ra bi mehneya ‘destûr nêameyo girewtiş’ ame qedexekerdiş.

Konserê hunermend û Endamê PMyî yê Partîya Demokratîke ya Şaran (HDP) Pinar Aydinlar û hunermendo ke bi deyranê xo yê kurdî yeno zanayene Çarnewa hetê Walîtîya Mêrsînî ra bi mehneya ‘destûr nêameyo girewtiş’ ame qedexekerdiş. Konser do ewro Merkezê Kulturî yê Ataturkî yê Yenîşehîrî de biameyêne kerdiş û hetê Atolyeya Hunerî ya Akdenîzî ra ameyêne organîzekerdiş

Atolyeya Hunerî ya Akdenîzî hesabê xo yê medyaya sosyalî de îzehetêk da û va: “Badê nîmrojî teblîxê qedexekerdişê konserî resa ma. Salona ke ameyêne plankerdiş ke do konser tede bibo de destûrê Walîtî ferz nîyo û heta nika wina nêameyo kerdiş. Qerarê qedexekerdişî goreyê îlkeyê yewî nîyo. Her çiqas ke ma seba viraştişê konserî Walîtîya Mêrsînî reyde pêvînayîşan bikerî zî heme hewldayîşê ma bênetîce mendî. Ma do hetê konserî de israr bikerî. Eke siba nêbo zî ma do sewbîna tarîxêk de konser pê bîyarî û muracatan bikerî. Kesê ke bilêt girewtî eşkenî aye tarîx de bi bilêtanê xo yê kehenan bêrî.”