Tirkîye 2 madeyan daxî pê nêarda

Merkezê Xeberan

Akin Bîrdal 12. Fuarê Kitaban yê Çukurova de tewrê panel bî û qisey kerd. Bîrdalî qiseykerdişê xo de bale ant binpaykerdişê heqan, azadîya çapemenî, weçînayîşê herêmî û grevê vêşanîye yê Leyla Guvene ser.

  1. Fuarê Kitaban yê Çukurova do ewro biqedîyo. Fuar de goreyê serranê verênan herînayîş û eleqeya kitaban kêmî bî û xeylê organîzasyonî ameyî kerdiş. Akin Bîrdal û Rojnameger Nazim Alpmanî tewrê panelo ke fuar de mae kerdiş bîyî û qisey kerdî. Bîrdal qiseykerdişê xo de bale ant binpaykerdişê heqan, azadîya çapemenî, weçînayîşê herêmî û grevê vêşanîye yê Leyla Guvene ser.

Bîrdalî wina va: “Bîldirgeyê Heqê erdiman 30 madeyan ra pê yeno, la Tirkîye hema 2 madeyan daxî pê nêarda. Çend rojî verê 10ê Çele Roja Rojnamegeran bî. Azadîya çapemenî ya Tirkîye çiman ver de ya. 8ê çele serrgêra qetilkerdişê Metîn Goktepeyî ke bi îşkence ameybî qetilkerdiş bî. Hrant Dînk kamîya xo ya sosyalîst, ermenî û rojnamegerî vera ame qetilkerdiş. Eke bêro perskerdiş vanê ke welat de azadîya çapemenî esta. Dinyaya emperyalîs û kapîtalîst hukm, huqûq û heme çîyan gîrewta bin kontrolê xo.”

YSK bîya komeleya burokrasî

Bîrdalî dewamê qiseykerdişê xo de qala weçînayîşê herêmî kerd û va: “Her çiqas ke MHME qerarê serbest veradayîşê Selahattîn Demîrtaşî bido zî Tirkîye pê nêarde. Herinda hukmkerdişê Tirkîye de vatî ‘Ma bi endîşe ewnîyenî çîyê ke Tirkîye de benî.’ 85 hemserekê şaredarîyan ke bi îradeya şar ameyî weçînayîş tewqîfkerdeyî. Çîyo muhîm demokrasî yo. YSK bîya komeleya burokrasî. Cok ra ma bawer nêkenê ke YSK bi heq têbigêro.”

Xoverdayîşê Guvene seba edalet, aştî, huqûq û ameyox o

Bîrdalî tewr peynî bale ant caardişê zindanan û grevê vêşanîye yê hepsîyan ser û wina qedêna: “400 ra zêde hepsîyê nêweş zindanan de yî. grevê Leyla Guvene roja 67. de yo û rewşa aye krîtîk a. Guvene seba ke sucêko ke teberê Qanûno Bingeyî yeno kerdiş û serê Ocalanî de yeno meşnayiş, kewte grev. Xoverdayîşê Guvene seba edalet, aştî, huqûq û ameyox o. Cok ra ganî heme kesî veng bidê Leyla Guvene.”