Ocalan qalê Îmraliyî keno – III

Coxrafyayê Rojakewtene û Rojawanî, Asya û Ewropa û yê Anadolu û Grekan tîyatroyê Îmraliyî yo ke tam sey şeklêkê tîyatroyî ramojîyeno anê ra.

Rayberê Şarê Kurdî Abdullah Ocalanî sîstemê Îmraliyî zî sey perçeyêkê Komploya Mîyanneteweyîye vîneno. Ûca tena sey zîndanêk nê sey cayo ke modernîteya kapîtalîste şexsê ci de şarê Kurdî û şarê herême xo rê hedef girewto vîneno. Ocalan nûşteyan û pêvînayîşanê xo de nê sîstemî tehlîl keno, senî mucadeleyêkê pîlî hemverê nê sîstemî de dano îfade keno.

Kitabê Ocalanî yê bi nameyê ‘PAWITIŞÊ MHMEYÎ – DEWLETA SUMERE YA RAHIBAN RA VER BI KOMARA ŞARÎ’ de prosesê komploye û rastîya Îmraliyî bi eşkerayî arîyenê verê çiman. Ma qismê hîrêyinî pare kenê:

Îmkanê bi temamî famkerdişê rastîya kurdan

Ercnayîşê sinifkî û neteweyî yê ke bi peymeyanê hemdeman yenê kerdene îmkan nêdanê ke rastîya Kurdan tam fam bibo. Na babete de ercnayîşî bêrê kerdene zî do mucered bimanê û xo mîyan de xeylî xeletîyan ê polîtîkan vejê werte. Seba ke problemî sînorê Rojakewtena mîyanêne vîyartê ganî problem çarçiwaya tarîxê medenîyetî de bigîrîyo dest. Eke rastîya  problemî nêro zanayene do netîceyê prosesê huqûqîyî de zî netîceyêko rast nêvejîyo werte.

Peymannameya Heqanê Merdiman a Ewropa (PHME) û Mehkemeya Heqanê Merdiman a Ewropa (MHME) sazîyê huqûqê demokratîkî yê tewr peyênî yê medenîyetê Ewropa yê. Na rastîyêka bêmunaqeşe ya ke temsîlkarîya biwesfe û serdeste ya medenîyetê ma yê ewroyênî hetê peymeyanê Ewropa ra yena bewlîkerdene. Bi hawayêkê îronîkî ewro Kurdê ke verê beranê Ewropa de seba problemanê xo çareyan gêrenê eslê xo de çimeyê medenîyetî yê. Maya ke zaf bîya kokime torinanê xo yê ke dergûşa xo de kerdê weyî ra edalet pawena. Tirêm do na maya medenîyetî rê heqê ci bêro dayene? Problem tayê zî bi nê hawayî xetimîyayo.

Tîyatroyê Îmrali yo dadgerkî

Keso ke rêze ra zî eke bieşko bidîqet biewnîro do bivîno ke kamî na senaryoya tîyatroyê dadgerkîyî nûşta, rolê serekeyî senî ameyê parekerdene, aktor û fîguranî kam ê û yeno waştene ke temaşekaran rê çi mesajî bidîyê. Na dewaya mi ya ke MHMEyî çarçiwayêka tenge de girewta xo dest beno sebeb ke zafê rastîyî bêrê peygoşkerdene û perdeyê tîyatroyî yo peyên bêro pêşkêşkerdene. Her çend beno ke qerarêko adil nê sazîyanê huqûqî yê demokratîkan ra nêvejîyo zî qe mebo do ercnayîşêkê azadî rê îmkan bido, ez roşinkerdişê tarîxê leymin, gonin û bêbextî yê peyê na dewa sey gureyêko bingeyên vînena.

Na dewaya ke dej û vîndîkerdişê ci pîl ê seba ke her kesî rê dersê lazim û biqezencî bêrê dayene ganî berpirsîyarî gureyê xo yê eşkerakerdişî bi serfirazî bica biyarê. Çîyo ke layiqê dewayanê tarîxkîyan o no yo. No gure çend bi manîdarî bêro bicaardene dewa bi xo zî do hende bibo layîqê sifetê tarîxkîyî.

Înan ez Îmrali de kerda tabûtêk mîyan

Na rastî ya ke hewna ma Rojakewtena mîyanêne de cigêrayîşî heqan dima bî seba ke ez hêzanê emperyalîzmî yê ke zextî kerdêne dir pêameyîş virazî mi verê xo da Ewropa. Mi waşt ke çarçiwaya peymeyanê înan ê demokratîkan de ma çareserîya makûle vejê werte. Birastî koyî tim xemlê hewnanê mi bî. Seba ke ez vejîyî ko mi çewres serrî sebir kerdibi. La şîyayîşê koyî do hîna zaf bibîyêne sebebê vîndîbîyayîşê embazanê mi û şarê ma û ez nêeşkayêne şîyayîşê koyî tercîh bikerî. Na zî rastîyêk a ke ez nêeşkaya verî ra bivînî ke şîyayîşê mi yê Ewropa do bi trajedîyêk netîce bibo. Ez nêeşkaya hesab bikerî ke do îxanet û menfaaetperestî hemverê vejîyayîşê mi de hende sere wedarê û hîsîyatê xo vîndî bikerê. Înan pêmawit, sent peynî de bi hawayêkê nimz û bi îxanetî ez Afrîka de teslîmê welatê merdimwerî kerda. Dima ra bi westatî ez paket kerda û Îmrali de kerda mîyanê tabûtêk.

No hal eke esto heverê huqûqê Ewropa de yo. Şertê Ewropa dir têkilî ronayîşî vînayîşê antîtezêk bi. Eke ez bieşkayêne antîtezêk bivînê ez do bieşkayêne Ewropa dir bikewî têkilî. No giredayeyê vejîyayîşê antîtezê Rojakewtena mîyanêne yê hemverê medenîyetê Ewropa bi. Mi waşt ke nê îzah bikerî û ramojnî. Bisînor bo zî ez bawer kena ke ez bi ser kewta.

Vînayîş û krîtîkê ke mi pêşkêş kerdî wayîrê wesfê pawitişêk de yê û hucreyêka yew kesî de binê tesîrêkê komploya girane de vejîyayê werte. Nê qismî de do hîna zaf problemê metodî yê tarîxê Kurdan, têkilîyê Kurdan-Tirkan, çareserîya demokratîke, virazîyayîşê komploye, manaya ci, huqûqê Ewropa û ercê MHMEyî bêrê tehlîlkerdene. Krîtîkê ke do bêrê kerdene do mi rê hêz bidê. Heta mi dest ra ame mi giranî daye hetanê musnayoxan. Waşt ke metodêk vejî werte. Ez bawer kena ke do netîceyêkê pozîtîfî bido.

Şorişê zihnîyet û wijdanî

Labelê babeta dîn û Homayî de beno ke tayê ercnayîşê mi rayîr ra dûr bifînê. La ez bawer kena ke tewr zaf zî ez na babete de bihêz a û qerardarîya mi esta ke şorişê îdeolojîkî hîna aver berî. Şorişê zihnîyetî mi het zaf muhîm o. Ez bawer kena dimayê nê ra zî wijdano azad û oyo ke eşkeno bieşnawo vejêno werte. Heta şorişê zihnîyet û wijdanî nêro kerdene şorişgêr bîyayîş ca verdê, kes nêeşkeno bibo hîsdar û biexlaq zî. Na yewe ra ez wazena her kesî ra û şarê ma ra vajî seba ke mi dereceya eleqedarîya înan de cewabî dayê zereyê mi rehet o. BEDÎNAN – ANF

Do dewam bikero….