Ma seba girewtişê esteyanê domananê xo mucadele kenîmê

3 keyeyan ê ke 1 serre ra zêderîyo Goristanê Xerzanî ra cenazeyê domananê înan ameyî vetene, muracatê Dozgerîya Bedlîsî kerd ke wa esteyê domananê înan peyser bêrî dayene. Keyeyî vanê: “Mucadeleyê ma o yo ke wa esteyê domananê ma peyser bidîyê ma.”

Bejayîya dewa Oleka Jorî ya girêdayîya merkezê Bedlîsî  de, tarîxanê cîya cîyayan de 267 cenazeyê endamanê PKKyî Goristanê Xerzanî de ameyîbî defînkerdene. Goristan, 22ê  Kanûne ya 2015î de bi operasyonê leşkerî amebi vêşnayene û texrîbkerdene, bi talîmatê dozgerîye cenazeyî ameyîbî vetene û erşawîyayîbî Sazîyê Tibê Edlî (ATK) yê Stenbolî.

Keyeyan nê qewimîyayîşî ra dima muracatê Dozgerîya Bedlîsî kerdo û nimûneyê gonîye dayî. La heta nika bê di keyeyan kesî cenazeyê domananê xo peyser nêgirewtê. Keyeyî rijnayîş û talankerdişê goristanî ver reaksîyon musnenê û vanê wa rojê avêr cenazeyê ma bidîyê ma.

Yew serre ya wazenê ke wa cenazeyî bidîyê înan

Kênaya Mecbure Elma, Nadîre Elma  ya  ke serra 1993î de beşdarê PKKyî bîya û 6 serran ra dima ke şehît kewta, cenazeya aye zî 4 serrî cuwa ver Goristanê Xerzanî de ameya defînkerdene. Mecbure Elma zî seba ke esteyanê kênaya xo bigîro muracat kerdo. Mecbure Elma wina vana: “Yew serre ra zêde yo ke cenazeyî goristan ra vetê. Ma cenazeyanê xo, esteyanê domananê xo wazenîme û seba naye mucadele kenîme“

Meyîtan ra çi wazenê

Kasim Tok zî pîyê ke esteyanê domananê xo wazenê nînan ra yew o. Lajê ey Nazim serra 1991î de beşdarê PKKyî bîyo. Qaso ke Tok vano heta serra 1994î lajê xo ra xebere girewta, la pey cû ke kewto hepis têkilîya ci birîya. Kasim Tokî wina dewam kerd: “Pey cû ma mecbur mendî û bîyî macir ameyî Stenbol. Serra 1994 î de ma  xebera şehadetê lajê ma  û hevalanê ci girewte. Serra 2013î, de wextê prosesê aşitîye de ma cenazeya lajê xo tespît kerde û arde Goristanê Xerzanî.“

Tokî derheqê vêşnayîşê goristanî de wina qisey kerd: “Meyîtê ke Goristan de yê vetê û berdê. No qet bi yew dînî nêno tarîfkerdene. No karê wîjdanî nîyo. Meyîtan ra çi wazenê! Ma nimûneyê gonîye dayî û wazenîme ke wa esteyê domananê ma bidîyê ma.”

Şemsettîn Yilmazo ke esteyanê kênaya xo Ozlem Yilmaze wazeno zî vat ke ma eşnawitê  ke meyîtê kênaya ma zî Goristanê Xerzanî de yo û ma wazenîme ke cenazeya ma bidê ma. BEDLÎS – MA