Leman Yurtsever: Zextê serê komelî zaf muhîm o

Sekretera ÎHDyî ya Stenbolî Leman Yurtsevere dîyar kerde ke ganî waştişê Leyla Guven û hepsîyan pê bêrî û ê do sey rêxistinê komelo sivîl û heqê merdiman bikewî mîyanê hewldayîşan û zextê serê komelî zaf muhîm o.

Çalakîya grevê vêşanîye ya bêdem û bênêagêraye ya Hemsereka Kongreya Komela Demokratîke (KCD) û parlementera Partîya Demokratîke ya Şaran (HDP) ya Colemêrgî Leyla Guvene roja 71. xo dima vera daye. Netîceyê çalakîye de  Abdullah Ocalan û Mehmet Ocalanî pêvînayîş pê ardî û derheqê pêvînayîşo ke pê ame de çîyêk nêame vatiş. Hepsîyî zî dîyar kerdî ke heta tecrîd bi temamî nêwedarîyo do fek çalakîya xo ra vera nêdî.

Derheqê babete de Sekretera Komeleya Heqê Merdiman (ÎHD) ya Stenbolî Leman Yurtsevere qisey kerde û arde ziwan ke herçiqas ke Leyla parlementer biba zî meclîs ti gamêk nêeşto û wina dewam kerde: “Ti kesêk bîlasebeb bedenê xo nêdano mergî ver. Helhet kesêk nêwazeno zirar bivîno. La sewbîna ti raybazêk vera nêdayî û hepsî kewtî grevê vêşanîye. Komel de bêvengîyek esto.”

Parlementerêk çimanê ma ver de helîyena

Yurtsevere dewamê qiseykerdişê xo de wina va: “Ma pawitoxê heqê merdiman î û heqê cuye pawenî. Ganî her kes goş bido waştişanê kesê ke grevê vêşanîye de yî ro. Parlementerêk çimanê ma ver de helîyena. Îradeya 6 mîlyon kesan temsîl kena. Parlamenterêka cografyayêk temsîl kena ra ya. Ganî bi hawayo lez çiyêk bêro kerdiş û gam bêro eştiş.”

Ganî vindetişê dewlete bêro bedilnayîş

Sekretera ÎHDyî ya Stenbolî Leman Yurtsevere tewr peynî dîyar kerde ke ganî waştişê Leyla Guven û hepsîyan pê bêrî û ê do sey rêxistinê komelo sivîl û heqê merdiman seba qebulkerdişê waştişê hepsîyan bikewî mîyanê hewldayîşan û zextê serê komelî zaf muhîm o. Yurtsevere daye zanayene ke ganî vindetişê dewlete bêro bedilnayîş. STENBOL