Amed do 19ê Çileyî de biwerizo payan ser

Merkezê xeberan

HDP seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene û piştîdayîşê çalakîya Leyla Guvene û heme xoverdekaranê grevê vêşanîye do 19ê Çileyî de Amed de mîtîg pê bîyaro.

Partîya Demokratîke ya Şaran (HDP) seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene û piştîdayîşê çalakîya Leyla Guvene û heme xoverdekaranê grevê vêşanîye do 19ê Çileyî de Amed de mîtîg pê bîyaro. Mîtîng seba piştîdayîşê çalakîya Hemsereka Kongreya Komela Demokratîke (KCD) û parlementera HDPyî Leyla Guvene û heme xoverdekaran bi siloganê ‘Demokrasî, Azadî û Edalet’ pê bêro.

Komîteya Amadekar seba mîtîngî muracatê Walîtîya Amedî daye. Walîtî cewabêko pozîtîf da û destûr da ke çalakî pê bêro. Goreyê malumatê Komîteya Amadekar mîtîng do saet 12.00 û 16.00î de pê bêro. Serekê Komîteya Amadekar ya Mitîngî Ramazan Kavalî seba tewrbîyayîşê mîtîngî veng da şarê Amedî.