Seba Raşteyê Îstasyonî veng: Leyla Guvene heqdar a û ganî tecrîd wedarîyo

Dersîm Daga HDPyî seba mîtîngê ‘Demokrasî, Azadî û Edalet’ ke do siba Amed pê bêro veng daye û dîyar kerde ke ganî her kes bi siloganê ‘Leyla Guvene heqdar a û ganî tecrîd wedarîyo’ tewrê mîtîngî bibî.

Partîya Demokratîke ya Şaran (HDP) seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene û piştîdayîşê çalakîya Leyla Guvene û heme çalakgeranê grevê vêşanîye do 19ê Çileyî de Raşteyê Îstasyonî yê Amedî de do mîtîg pê bîyara. Mîtîng seba piştîdayîşê çalakîya Hemsereka Kongreya Komela Demokratîke (KCD) û parlementera HDPyî Leyla Guvene û heme çalakgeran bi siloganê ‘Demokrasî, Azadî û Edalet’ pê bêro.

Parlamentera HDPyî ya Amedî Dersîm Dage seba mîtîngê Raşteyê Îstasyonî veng daye û wina va: “Ganî her kes seba wedarnayîşê tecrîdî bêro raşteyê mîtîngî. Ganî xoverdayîş bibo xoverdayîşê azadîye yê her kesan.  Bêrêne ma pîya bibî vengê heme xoverdekaran û vengê bidî vengê înan.”

Ma do bibî vengê Leylaye

Aktîvîsta Tevgerê Cinîyanê Azadan (TJA) Remziye Siziciye zî veng daye cinîyan û daye zanayene ke ganî wayîrê çalakîya Leyla Guvene bêro vejîyayîş û va: “Leyla Guvene seba wedarnayîşê tecrîdî no 72 rojî yo ke grevê vêşanîye de ya. Çalakîya Birêz Leyla Guvene çalakîya ma heminan a. Waştişê aye waştişê ma heminan o. Leyla Guvene îradeya heme cinîyan a. Ma do bibî vengê Leylaye. Ma veng danê her kesî ke bêrî Raşteyê Îstasyonî.” AMED