Hukmatê Almanya waşt ke tecrîdkerdişê Ocalanî biqedîyo

Hukmatê Almanya ê Federalî waşt ke tecrîdkerdişê Rayberê Şarê Kurdî Abdullah Ocalanî biqedîyo. Wezîrê Dewletî Rothî yo ke Berpirsîyarê Gureyê Ewropa yo veng da hukmatê Enqere û waşt ke Ocalan wa keye û avûkatanê xo dir pêvînayîş virazo.

Tecrîdo girankerde yo ke Rayberê Şarê Kurdî Abdullah Ocalanî ser o yeno domnayene, rojanê ravêrteye de kewtbi rojeva meclîsê Almanya. Partîya Çepî Hukmatê Angela Merkele ra derheqê Îmraliyî de persêk persabi.

Parlamenterê partîya Çepî Michel Brandtî hukmatê Almanya ra wina persabi: ‘‘Derheqê rewşa weşîya Abdullah Ocalanî yo ke Îmrali de yeno tepiştene de zanayîşê Hukmatê Federelî esto? Hukmato Federel seba ke Komîteya Vernîgirewtişê Îşkenceyî (CPT) Leyla Guvene ya ke seba wedarişê tecrîdê serê Ocalanî grevê vêşanîye de ya, zîyaret bikero, do çîyêk bikero?‘‘

Vizêr bi nameyê hukmatî Wezîrê Dewletî Michael Rothî nuştekî cewab da. Rothî vat ke ma sey hukmatê Almanya binê ci xêz kenî ke Tirkîya ke endama  Konseya Ewropa ya sey heme qanûna bînan ganî babeta tepişteyan de zî goreyê Peymana Heqanê Merdiman a Ewropa tê bigêro.

Rothî wina veng da îdareyê Eqere: “Hukmatê Tirkî ganî pêkewtişê xo bi muxalefetî hîna gird mekero. Hukmatê Federalî nê tewirê xo cuwa ver zî  hukmatê Tirkîya ya piya Teşkîlatê Hemkarî û Asayîşî yê Ewropa (AGÎT) forûmanê zaf bi hetanî û Konseya Ewropa de ard ziwan.”

Ganî astengîyê Îmraliyî bêrî wedartene

Rothî vist vîrî ke îrtîbatê înan tim bi temsîlkaranê HDPyî est û derheqê Rayberê Şarê Kurdî Abdullah Ocalanî de nê vatî: “Derheqê rewşa weşîya ronayoxê PKKyî yo tepişte Abdullah Ocalanî de Hukmatê Federelî çîyêk nêzano.  Ma zî sey şima çapemenî ra zanê ke ey dir pêvînayîşî nêno viraştene. Hukmatê Tirkî rê vengdayîşê ma no yo ‘Ocalan ganî merdim û avûkatanê xo dir pêvînayîş virazo. Reyna tepişteyê bînî ke Îmrali de yê ganî astengîyê serê înan zî bêrî wedartene.’”

Rothî persê parlamentera Partîya Çepî Heike Hansel yê derheqê hêrişê rojawanî zî wina cewab kerdbi; ma semedê vernî girewtişê nê hêrişî têgêrenê. BERLÎN