Ma seba xeyalanê xo kewtîme rayîr û bîme serkewte…

Jîyan Tekoşîn / BEDÎNAN

Zozan Çewlîke ya ke serra 1997î de Rayberê Şarê Kurdî Abdulla Ocalanî de pêvînayîş kerdo, derheqê ê demî de wina vana: “ Ma seba ke Rayber Ocalanî bivînîme kewtîme rayîr û bîme serkewte.”

Ma nê beşî de zî rayîrwanîya vîranînan domnenîme û rindekî û parekerdişî na rayîrwanîya ma hîna kenê weş û xorîn. Ma na dolime bîme mêmanê Zozan Çewlîke û wazenîme goş binîme vîrameyîşanê aye û Rayberê Şarê Kurdî Abdullah Ocalanî ser. Zozan Çewlîke serra 1997î de seba ke birêz Ocalanî bivîno, vera Şamî kewta rayîr û serebutê xo yê ê demî ma de pare kerdî.

Qaso ke Çewlîke vana hîna ke nêşîya Şam birêz Ocalanî de qisey kerdo û derheqê heyecanê xo yê ê demî de wina vana,“ Ez serra 1996î de, Eyaletê Erziromî de gerîla  bîya. Her çiqas bi zehmet bê zî, seba ma demê tewr başî bîy. A serre, yew roje gama ke ez wezîfe ra ameyêne hevalan venga mi da, va to rê yew surprîzê ma esto. O wext, Rayber Ocalanî bi cîhaz hêzan de tekilîye nayêne ro. Telefonê yewîya ma yo peykî estbi.

Hevalan mi ra va ti do Rayberî de qiseyî bika. Saet 5ê vereşanî de Rayberî dest qiseykerdişê xo yê telefonî kerd. Hevalan ra kam esto kam çin o, yew bi yew  pêro persayî. Pey cû ke hevalê cinîyî persayî embazan nameyê mi va. Rayberî ez waşta telefonî ser. Heyecanî ver mi xo şaş kerd. Pers kerd û va ti kotî ra ya û nameyê to çi yo. Pey cû mi ra wina va:‘Beno ke ti uca de tena ya, la xo vîr ra meke ke ti rêxistina cinîyan temsîl kena.‘ O wext zî rêxistina cinîyan YAJK bî. Wexto ke mi ra va ti uca de YAJKî temsîl kena, mi newe fehm kerd ke barê mi çiqas giran o.”

Rixmê hêrişanê dişmenî…

Vînayene… tena seba vînayene, Zozan Çewlîke û embazanê xo, xeylî zor û zehmetî girewtê xo çim. Zozan Çewlîke û embazê xo yê ke nêzdîye 24 kesan bîyê, serra 1997 de Erzirom ra vera Cudî, Cudî ra zî vera Şamî, seba ke Ocalanî bivînê kewtê rayîr. Çewlîke wina vana: “Ma heta Çîyayê Sipîyî şîme la o dem dişmenîpusu zaf nayene ro. Xeylî şehadetî bîyêne. Naye ser Rayberîye  gruba ma daye vindarnayene.. La ma hevalê ke mendîme ma va, se beno wa bibo ma do şorê. Vera ê hêriş û pusuyan ma reyna zî kewtîme rayîr. Ma seba xeyalê xo yê vînayîşê Rayberî kewtîme bi rayîr û bîme serkewte. Wexto ke mi Rayber dî, xeyalê mi bîyî rast. Mi se nameyê xo va ez nas kerda, çîyo ke mi de tewr tesîr kerd zî no bî. Tena yew dolime, wexto ke ez Erzirom de bîya ma telefon de qisey kerdbi. Û ez hema nas kerda. Hafizaya xo zaf pête bîye. Wexto ke mi ra va ti a kênaya Çewlîgije ya Elawîye ya ez mat menda û mi va hande kesan de qisey keno la reyna zî xo vîr ra nêkeno.”

Huzbarê Rayberîye de cayê qisaya ez nêeşkena bika çin bi

Zozan Çewlîke vana Rayberê Şarê Kurdî Abdullah Ocalanî çiyanê klasîkan ra neyret kerdêne û qiseykerdişê xo wina domnena: “Rayberîye tayê persî persayî û pey cû mi ra wina va:“Ti xeylî zor û astengan ra derbaz bîya. Tecrubeyê to yê şerî zî esto. Tena problemê nas nêkerdişê mi esto to de. Yanê ganî ti rastîya rayberîye nas bika û aye zî ti do mi ra bimusa. Her çiyî ra ver bi persanê xo ma de nakokîyî kerdê peyda û bi no qeyde ewnîyayêne ke helê ma çi qebul keno û çi red keno. Hetê bînî ra zî hêzêko muazam dayêne ma. Ma ey ra hêz girewtene. Huzbarê Rayberî de cayê qisaya ‚ez nêeşkena bika‘ çin bi.”