Xoverdayîşê Leyla Guvene hêz dano heme kesan

Cinîyê Îzmîrî bale antî çalakîya vêşanîye ya Hemsereka KCDyî Leyla Guvene ser û dayî zanayene ke ganî tecrîdê serê Rayberê PKKyî Abdullah Ocalanî bêro wedartene û wina vatî: “Xoverdayîşê Leyla Guvene hêz dano heme kesan.”

Zindanê Tîpa Eyî yê Amedî de çalakîya grevê vêşanîye ya parlementera Partîya Demokratîke ya Şaran (HDP) û Hemsereka Kongreya Komela Demokratîke (KCD) Leyla Guvena ke seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene roja 73. de dewam kena.

Cinîyê Îzmîrî bale antî çalakîya vêşanîye ya Hemsereka KCDyî Leyla Guvene ser û dayî zanayene ke ganî tecrîdê serê Rayberê PKKyî Abdullah Ocalanî bêro wedartene. Derheqê babete de cinîyê Îzmîrî ra Nîhal Akyildiz, Hacer Erdogan, Abîde Bayram û Hulya Zeydane qisey kerdî.

Her ke şono xoverdayîş hîna pîl beno

Akyildize dîyar kerde ke şexsê Guvene de peynîkerdişê tecrîdî waştişê heme şaran o û wina dewam kerde: “Bi saya xoverdayîşî Birêz Ocalan birayê xo reyde pêvînayîş viraşt. La no pêvînayîş tena seba reyêk bî. Tecrîd hema zî dewam keno. Hema zî waştiş nêameyî tebulkerdiş. Selma Irmak û Aysel Tugluke zî dest bi çalakîya grevê vêşanîye kerdî. Her ke şono xoverdayîş hîna pîl beno. Ma baş zanê ke do no têkoşîn tecrîdkerdişê Birêz Ocalanî raşte ra wedarno û aştî pê bîyaro. Hema ke grevê vêşanîye nêkewto rewşêka tehluke, ganî dewlete çimanê xo akera û cewab biba waştişanê hepsîyan.”

Ganî waştişê înan bêrî qebulkerdiş

Erdogane qiseykerdişê xo de ard ziwan ke ganî hemverê waştişê Leyla Guvene de kes çimanê xo nêgîro û va: “Tecrîd yeno mehneya xespkerdişê heqan. Nika ke weşîya Guvene û hepsîyan nêkewta merheleyêka krîtîk ganî waştişê înan bêrî qebulkerdiş.”

Kesê ke wazeni Îmrali bidî vîrîkerdiş xo xapênenî

Bayrame zî daye zanayene ke tena zindanan de nê heme cayan de tecrîd esto û domnaye: “Tecrîd nîno qebulkerdiş. Bi saya Leyla Guvene têkoşînê hemverê tecrîdî gird bî. Ganî her kes hemverê tecrîdî de têkoşîn bido. Kesê ke wazeni Îmrali bidî vîrîkerdiş xo xapênenî.”

Xoverdayîşê Leyla Guvene hêz dano ma heminan

Cinîyan ra tewr peynî Zeydane qisey kerde û aye zî wina va: “Tecrîd suc o. Xoverdayîşê Leyla Guvene hêz dano ma heminan. Ganî bi hawayo lez tecrîd peynî bibo û  weşîya Guvene û heme hepsîyan baş biba.” ÎZMÎR

This slideshow requires JavaScript.

Dikarî Biecibînî