Leyla Guvene mesaj erşawite: Ma do bi bawerî û îrade xoverdayîşê xo serkewte bikerî

Leyla Guvene 73. rojî ya ke hemverê tecrîdo ke serê Rayberê PKKyî Abdullah Ocalanî de yeno meşnayene kewte grevê vêşanîye. Seba mîtîngê Amedî partîya xo HDPyî rê mesajêk erşawite. Guvene dîyar kerde ke heta ke tecrîdê serê Ocalanî peynî nêbo, ê do çalakîya xon dewam bikerî û wina va: “Ma do bi bawerî û îrade xoverdayîşê xo serkewte bikerî.”

Partîya Demokratîke ya Şaran (HDP) seba bale antişê serê tecrîdo ke serê Rayberê PKKyî Abdullah Ocalanî de yeno meşnayene û çalakîya grevê vêşanîye Raşteyê Îstasyonî yê Amedî de bi siloganê ‘Demokrasî, Aştî û Edalet’ mîtîngêk pê arde. Leyla Guvene 73. rojî ya ke seba wedarnayîşê tecrîdî Zindanê Tîpa Eyî yê Amedî de grevê vêşanîye de ya û seba mîtîngê partîya xo HDPyî mektub erşawite.

Mektubê Leyla Guvene hetê Parlementera HDPyî ya Amedî Dersim Dage ra ame wendiş û mektub de wina ame nuştiş: “Şarê ma yo erjîyaye, hemrayê cinî; merhaba rîyê roşne yê Amed, Botan û Serhedî. Ez şima yew bi yew silam kena. No proseso zehmetin yê tarîxî ke ma tede de yî de, ez wazena vaja ke ma do pîya serkewte bibî. Tecrîdê serê Birêz Ocalanî daîmîbîyayîşê aştîya komelî asteng keno. Birêz Ocalan awankerdişê awankerdişê aştîya komelî de aktorêko muhîm o. No bi ceribnayîşanê teorîk û pratîkî de xeylê reyan îspat bî. Cok ra hayîya komel heme raştîyan ra esto. Roja destpêk ra nata 7 ra heta 70î şar wayîrê çalakîya ma vejîya. Ma bawer kenê ke mi û embazê mi yê zerre vengê xo dayî eşnawitiş û ma do netîce zî bigîrî.

No şaro xoverdekar, cinîyê zerrîwaştoxê azadîye û demokrasîye, ciwan, nifşo ke Dehaqî ra nata hemverê zaliman de sere wedarnayî do reyna werizî payan ser û bedelê ci çi beno wa bibo do serkewtiş bigîrî dest. Bi bawerî û îradeya x oma do peynîya xoverdayîşê xo de biresî serfirazî. Ez nê rojanê xoverdayîşî de peynîya dêsan de şima heminan silam kena. Bi germîya hemrayîya zerrîya xo şima verik kena.”  AMED

Dikarî Biecibînî