Sîyasetmedarê kurd yê Ewropa dest bi çalakî kerdî

Merkezê Xeberan

Weçînitox û sîyasetmedarê kurdî yê ke surgunê Ewropa ameyî kerdiş û Strasbourgî de cuyenî seba 4 rojan dest bi grevê vêşanîye kerdî.

Sîyasetmedar, weçînitoxê kurd, parlamenter û hemşaredarê Partîya Demokratîke ya Şaran (HDP) yê ke Ewropa de surgun de yî, seba piştîdayîşê çalakîya Leyla Guvene û bi waştişê wedarnayîşê tecrîdî Strasbourgî de dest bi çalakîya grevê vêşanîye kerdî. Sîyasetmedarê kurd çalakî ra ver bi siloganê ‘Ma do tecrîd bişiknî faşîzmî birijnî’ îzehet dayî.

Sîyasetmedarê kurd badê îzehetî şîyî raşteyê 15 xoverdekarê kurdî ke 37 rojî yo grevê vêşanîye yê bêdem û bêanêgêrayîşî de yî û û dest bi çalakîya grevê vêşanîye kerdî. Serê nameyê çalakgeran Parlamenterê HDPyî yê Wanî Lezgîn Botan û Parlamentera HDPyî ya Şirnexî Leyla Bîrlîke îzehet wendî. Leyla Bîrlîke veng daye komeleyanê ewropa, CPT û rêxistinê mîyanneteweyî û waşte ke hemverê tecrîdkerdişê Ocalan û çalakîya Leyla Guvene de bêveng nêmanî. Kome badê îzehetî siloganê ‘Tecrîdî rê nê, Ocalan rê Azadî, Bicuye Xoverdayîşê Zindanan û Cinî Cuye Azadî’ berz kerdî.