Kurdî qertê ziwan yê weşî de çin o

Nêweşxaneyê Parka Medîcal yê Xarpêtî de seba nêweşê ke tirkî nêzanê bi 17 ziwanê cîya cîyayan xizmet yeno dayîş, labelê zaf ecêbo ke ziwano ke herême de hende yeno qiseykerdene yê kurdî tede çin o.

Nêweşxaneyê Parka Medîcal yê Xarpêtî de seba nêweşê ke tirkî nêzanê qertê ziwan yê weşî ame viraştiş û mîyanê ci de ziwano ke tewr zêde Tirkîye de yeno qiseykerdiş ziwanê kurdî çin o û sewbîna 17 ziwanî estî. hedîse ra dima nêweşxane da zanayene ke no bicaardiş hetê Wezîrîya Weşî ra ameyo kerdiş. rêxistinê weşî bale antî muhîmîya xizmeto ke bi ziwanî nêweşî yeno dayîş ser û dîyar kerdî ke no bicaardiş cîyayê keno mabenê merdiman.

Serê qertê ziwan de ‘Heme kesan rê weşî’ yeno nuştiş û ziwanê Îngilîzî, Almanî, Fransî, Îspanyolî, Erebî, Îtalî, Romenî, Îbranî, Hirvatî, Bulgarî, Flemencî, Ukraynî, Boşnakî, Arnavutî, Japonî, Çinî û Rusî estî. Nêweşêk derheqê babete de temsîlkaranê rêxistinê weşî û partîyê sîyarî reyde qisey kerd. Nêweş dîyar kerd ke dayîka xo berda/o nêweşxane û dayîk tirkî nêzana do senî derdê xo bîyara ziwan. Wexto ke pere yeno dayîş heme kes yew yeno hesibnayîş, labelê heq yew nîyo. Derheqê babete de nêweşxane ra îdarekrêk da zanayene ke ê muhîmîya ziwanî zanî, labelê no bicaardiş hetê înan ra nê hetê Wezîrîya Weşî ra ameyo kerdiş û seba xerîbê ke pasaportê înan estî ameyo kerdiş.

Derheqê babete de Serekê Konseyê Merkezê ewîya Tabîbanê Tirkî (TTB) Sînan Adiyaman, Îdarekara Şûbeyê Xarpêtî ya Sendîkaya Kedkaranê Xizmetê Sosyal û Weşîye (SES) Aynur Ogute, Serekê Bajarê Xarpêtî yê Partîya Kede (EMEP) Murat Zulfîkar, Serekê Bajar yê Partîya Demokratîke ya Şaran (HDP) Bakî Yildirim û Serekê Bajar yê CHPyî Zeki Kaplanî qisey kerdî.

Kesê ke qisey kerdî û vatî: “Tirkîye de ziwano ke tewr zêde yeno qiseykerdiş ra ê diyîn zî kurdî yo. Prosesê tedawî de çîyo tewr muhîm nêweş reyde qiseykerdiş û fehmkerdiş o. Eke doktor ziwanê nêweş nêzana/o ganî tercumanêk bêro. Mîyanê 17 ziwanan de senî kurdî çin o. Ganî kurdî tewrê xizmetî bibo. Ma na cografya de çin hesibnayîşê ziwanê kurdî rexne kenî. Karê ma de cîyayeyê ziwan, dîn, bawer, cinsîyet û nijadî çin o.”

Dikarî Biecibînî