Zindanan de derbkerdiş bîyo sey rewşêka rûtîn!

Vervatoxa Komîsyonê Zindanan ya Şûbeyê Edene ya ÎHDyî Zelal Demîraye dîyar kerde ke Zindanê Tîpa Fyî yê Kurkçulerî de derbkerdiş bîyo sey rewşêka rûtîn.

Roj çin a ke zindananê Kurdistan û Tirkîye ra xeberê şîdet, derb, teda, heqaret û îşkenceyî nêra. Taybet badê îlankerdişê rewşa OHALî û dima ra dest pêkerdişê gerevê vêşanîye tedaya serê zindanan zêde bî. Nê zindanan ra yew zî Zindanê Tîpa Fyî yê Kurkçulerî yo. Zindanê Kurkçulerî yê Edene bi binpaykerdişê heqan rojeve ra nêkeweno. Vervatoxa Komîsyonê Zindanan ya Şûbeyê Edene ya Komeleya Heqê Merdiman (ÎHD) Avûkat Zelal Demîraye bale ante binpaykerdişê heqê hepsîyan ser.

Avûkat Zelal Demîraye qiseykerdişê xo de wina va: “20 hepsî 27ê teşrîna peyêne ya 2018î ra nata seba wedarnayîşê tecrîdê serê Rayberê PKKyî Abdullah Ocalanî bi hawayo komî grevê vêşanîye yê bêdem û bêanêgêrayîşî de yî. Hepsîyo bi nameyê Înan Akin zî 5ê çeleyî ra nata grevê vêşanîye yê bêdem û bêanêgêrayîşî de yo. Doktor nêşênî qawişê Înanî û o kontrol nêkenî. Şîyayîş û kewtişê zindanî de êdî hedîseyê derbkerdişî bîyo sey rewşêka rûtîn. Dozgerê zindanê nê bicaardişan qebul nêkeno û red keno. Binê derenceyan û odeyê vengan ke kamera tede çin î de hepsîyan kuyenî.”

Hepsî ameyî derbkerdiş

Demîraye qiseykerdişê xo yê peyênan de înan va: “Îdareyê zindan heme hepsîyanê ke bi sucê cîya cîyayan ameyî  tepiştiş pîya vejeno pêvînayîş. No zî beno sebebê munakeşeyan. Heqê pêvînayîşî yeno îxlalkerdiş. Gardîyanî hewteyo verên bi mehneya mazgalî de silam dayî sewbîna hepsîyêk, hepsîyê bi nameyê Ferhat Şendûr, Mûrat Sancak û hepsîyo ke peynameyê ci nêame zanayene Îbrahîmî bi hawayo şîdetin derb kerdî. Hedîse ra dima her yew hepsîyêk kerdî odeyê cîya cîyayan. Hepsîyo bi nameyê Îbrahîmî zî kerdî hucre. Derheqê babete de waştişname ame nuştiş û cewab de wina yeno vatiş; Silogan berz kerdî û gardîyan birîndan kerdî.” EDENE