ATKî ra seba Sîsê Bîngole ropor: Bi zanayîş xo xirab nîşan dana

Dezgehê Tibî yê Edlî (ATK) raporêk amade kerd û roporî de îdîa kerd ke Sîsê Bîngola 78 serrî “Cehd kena ke xo nêweş bimusna, eşkena hepisxaneyî de bimana” nîşan da.

Sîsê Bîngola 78 serrî ya Hepisxaneyê Cinîyan ê Tarsûsî de ya Nêweşxaneyê Unîversîteya Mersînî  seba aye raporêk amade kerdibi û wina vatibi “Se ra 97 fonksîyonî leşa aye de bîyê vîndî, mendişê aye bi hepisxaneyî seba weşîya aye bitehluke yo.” Dezgehê Tibî yê Edlî (ATK) raporêk amade kerd û roporî de îdîa kerd ke Sîsê “Cehd kena ke xo nêweş bimusna, eşkena hepisxaneyî de bimana” nîşan da.

Sîsê Bîngole dewa Badanî ya pabesteya qezaya Gimgimî ya Mûşî de 6ê Nîsane 2016î de gama erzîya keyeyê ci ser a bi hîrê kesan a pîya bi îdîaya “endama rêxistine” amîbî tepiştene û erzîyabî Hepisxaneyê Tîpê Eyî yê Mûşî. Hezîrane 2016î de vejîyaye mehkema û nêweşîya ci gîrîya verê çiman û ameye tehlîyekerdene. Netîceyê dewamkerdişê muhakemekerdişî Nîsane 2016î de bi îdîaya “paştîdayîşê rêxistine” ra 4 serrî û 2 mengî ceza ameye dayene. Sîsê Bîngole lajê xo yo ke eynî sucdarkerdişî ra yeno muhakemekerdene reyde ameyî tewqîfkerdene û verê şawitîyaye Hepisxaneyê Tîpê Eyî yê Mûşî, uca ra sewqê Hepisxaneyê Cîniyan ê Tarsûsî kerde.

Raporo ke dimayê tetkîkanê 8 heşt rojan de ameyo amadekerdene de, Sîsê serranê xo bîle nêzanena, nêno vîrê aye ke vizêrî çi werd werdo, zereyê kamcîn serre de ya û mengan nêzana, nameyê kesanê ke pîya ciwîyena nîyana xo vîrî, şewe û roje yewbînî ser o nêweçînena. Reyna, bîyopsîyo ke ameyo kerdene de rîskê rîşa merdimwere ya pişike û ercnayîşê ke seba nêweşîyanê bînan de ameyê kerdene zî se ra 97 fonksîyonî leşa aye de bîyê vîndî. No semed ra bale ante ser ke hepisxane de mendiş seba cuya Sîsê bitehluke yo.

Seba ke Sîsê bi tirkî nêzanena ercnayîşê psîkometrîkê ci yê Şûbeyê Tetkîkan ê Psîkolojîkî de testê aye yê zafêrî nêameyê kerdene. Roporî de na bebete de wina vat: “Ameyo vînayene ke  pêvînayîşo ke şexsî de ameya kerdene de ziwanê ci kurdkî yo, seba ke tirkî nêzanena testê ci yê zafêrî nêameyê viraştene, bi ardimê eskerê leyê xo çiqas dest ra ameyo bi duştê asanî têkilîye ronîyaye û netîceyê  pêvînayîşanê ke ameyê viraştene bi nê şekilî ca girewt…”

DTEyî roporê xo de îdîa kerd ke rewşa Sîsê Bîngole baş a û eşkena teyna bi sereyê xo ciwîyayîşê xo dewam bikera. AMED