Ciwanê HDPyî: Ganî her kes hemverê tecrîdî de vindetişê xo nîşan bido

Ciwanê HDPyî seba paştîdayîşê çalakîya Hemsereka KCDyî û Parlementera HDPyî Leyla Guvene, veng dayî heme beşê komelî û waştî ke ganî her kes hemverê tecrîdî de vindetişê xo nîşan bido. Ciwanan ardî ziman ke tewr zêde ciwan kewenî binê tesîrê tecrîdî û waştî ke cok ra ganî tewr zêde ciwan reaksîyon nîşan bidî.

Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene 8ê teşrîna peyêne de seba seba wedarnayîşê tecrîdkerdişê Rayberê PKKyî Abdullah Ocalanî Zindanê Tîpa Eyî yê Amedî de dest bi grevê vêşanîye yê bêdem û bêanêgêrayîşê kerdbî û ewro roja 78. yê grevî ya. Ciwanê HDPyî seba paştîdayîşê çalakîya Hemsereka KCDyî û Parlementera HDPyî Leyla Guvene, veng dayî heme beşê komelî û waştî ke ganî her kes hemverê tecrîdî de vindetişê xo nîşan bido. Ciwanan dîyar kerdî ke tewr zêde ciwan kewenî binê tesîrê tecrîdî û waştî ke cok ra ganî tewr zêde ciwan reaksîyon nîşan bidî.

Derheqê babete de ciwanan ra Endama Meclîsê Ciwanan ya HDPyî Dilan Çelîk, Endamê Meclîsê Ciwanan Orhan Demîr, Ferhat Azan û Mehmet Yildirimî qisey kerdî û bale antî tecrîdkerdişê Rayberê PKKyî Abdullah Ocalanî û grevê vêşanîye ke bi serkêşîya Leyla Guvene dest pêkerdbî û vila bibî heme zindanan ser.

Tecrîd vila bîyo pêroyê Tirkîye

Çelike qiseykerdişê xo de dîyar kerde ke tecrîd tena serê Ocalanî de nîno meşnayîş û wina dewam kerde: “Tecrîd vila bîyo pêroyê Tirkîye. Badê ke tecrîd xorî bî, komel û ciwanan ser de zext û teda zêdîya. Eke tecrîd wedarîyo do zext zî wedaro.  Eke tecrîd wedarîyo û rayîrê dîyalogî abî do problemî bi rayîranê demokratîk çareser bibî. Ganî heme ciwanî hemverê tecrîdî de vengê xo berz bikerî.”

Ciwanan ra Demîr zî qiseyekrdişê xo de waşt ke ganî bi hawayo lez waştişê hepsîyan bêrî bicaardiş û va: “Çalakîya Guvene û heme hepsîyanê bînan çalakîya demokratîk a. Ganî heme kes piştî bido înan.”

Ganî dewlete gamanê dîyalogî bierza

Azanî zî da zanayene ke ganî dewlete wextêko lez de game bierza û wina dewam kerd: “Ganî dewlete gamanê dîyalogî bierza. Seba ke dewlet gaman bierza ganî ma hîna zêde vengê xo berz bikerî. Seba ke waştişê ma bêrî bicaardiş, ganî ma hîna zêde têkoşîn bidî.”

Ganî heme ciwanê Tirkîye vengê xo berz bikerî

Ciwanan ra tewr peynî Mehmet Yildirimî qisey kerd û o zî wina va: “Ganî şer û pêrodayîş peynî bibî. Cok ra ganî ma hîna zêde vengê xo berz bikerî. Seba wedarnayîşê şerî ganî tecrîd peynî bibo. Tîya de rolê ciwanan zaf muhîm o. Nêwazenî ciwan sîyaset bikerî û cok ra zext bi ciwanan kenî. Ganî heme ciwanê Tirkîye vengê xo berz bikerî.” WAN