3ê Sibate de Stenbol do cewab bido vengê Amedî

Parlamenterê HDPyî seba mîtîngê 3ê Sibate veng dayî û dîyar kerdî ke Stenbol do veng bido vengê Amed û Leyla Guvene.

Grevê vêşanîye yê Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) Leyla Guvene roja 77. xo peyde verda. Badê Leyla Guvene sewbîna 300 girewteyê sîyasîyî zî dest bi grevê vêşanîye kerdî. Weşîya Leyla Guvene her ke şona bena xirabe û îqtîdar vera talebanê girewteyan bêvengîya xo domnena. HDPyo ke vera tecrîdî, 19ê Çile de Amed de mîtîngê ked, aştîye û demokrasîye organîze kerdbi, 3ê Sibate de zî do Îstanbul de mîtîngêk organîze bikero.

Parlamentera HDPyî ya Sêrtî Meral Daniş Beştaşe qisey kerde û beyanatê xo de bale ante weşîya Leyla Guvene ser û wina va: “Talebê Leyla Guvene ca de yê û ganî seba nê taleban şar zî vengê xo bikero berz. Heta ewro no derheq de hem zerre, hem zî teberê welatî ra ma xeylî peyamê paştdarîye girewtî. Seba ke munaqaşayî nêrê kerdene, tayê hetî astengîye vejenê. Îqtîdar zî serê ra nat bi bêvengîya xo naye keno. Goşê xo kerdê kerr û nêwazeno kes qisey bikero.”

Stenbol zî 3ê Sibate de do vengê xo berz bikero

Beştaşe va seba ke dêsê tersî bêrê rijnayene, ganî şar vengê xo hîna berz bikero û wina dewam kerde: “Çimkî no îsyano ke vera tecrîdî bîyo berz, esas vera bêhiqûqî, bêedaletî yo. Tecrîd nika her kesî ser esto, zereyê keyeyî de, cayê karî de, pêroyê cuye de, mezgê her kesî de yo. No tecrîdo mutlaqo ke Rayberê Şarê Kurdî Abdullah Ocalanî ser yeno domnayene her ca girewto binê têsîrê xo. Ma  bawer kenî ke Stenbol zî sey Amedî werizeno payan ser û  3ê Sibate de do vengê xo hîna bikero berz.”

Pêroyê Tirkîya polîtîkaya şerî ya

Parlamenterê HDPyî yê Stenbolî Musa Pîrogluyî zî derheqê grevê vêşanîye û mîtîngî de qisey kerd. Pîrogluyî derheqê bêvengîya rayapêroyî de tespîtê muhîmî kerd û va: “ Na bêvengîye newe nîya. Hereketê Sosyalîstanê Tirkîya ra tayê hetan, na mesela tam fehm nêkerda û sebebê na bêvengîye tayê zî înan ra ya. Yê diyîne zî hem polîtîkaya seraye hem zî awanbîyayîşê Komare ra nat polîtîkaya dewlete, sey parçe bike û wina îdare bike ameye karardene û kedkar û şarê Kurdî û Tirkî yewbînan ra ameyî visnayene. Naye ra yo ke ha grevê vêşanîye bo, ha tecrîd bo, ha zî Kurdistan de qewimîyayîşê bînî bê, seke dinya yan zî welatêko bîn de qewimîyayê, wina yenî dîyayene.Polîtîkaya înkarî ya vera Problemê Kurdî, seba pêroyê Tirkîya polîtîkaya şerî ya, teda û şîdet bi no qeyde yenî domnayene û seraye û îqtîdar bi nînan payan ser vindeno.Yew bloko ke vera seraye vejîno esto la no blok bêveng maneno. Senî ke vera seraye vejînê, ganî seba bêçareserîya problemê Kurdan de zî îtîraz bikerê.”

Mîtîngê 3ê Sibate muhîm o

Parlamentera HDPyî ya Amedî Remzîye Tosune zî na babete de va ‘serranê 99î ra nata tecrîdo ke Rayber Ocalanî ser yeno domnayene, esasê xo de pêroyê Tirkîya û Kurdan ser de yeno bicaardene. Tosune wina dewam kerde: “Leyla Guvene seba waştişanê xo yê şexsîyan nêkewta grevê vêşanîye. Tecrîd problemê pêroyê şar û hetan o. weşîya Leyla Guvene edî merheleya krîtîke de ya. 77 rojan ra zî derbaz bi. Leyla Guvene û embazanê ma yê hepisxaneyan ra yewî rê ke çîyêk bibo, mesulê xo îqtîdaro faşist ê AKP-MHPyî yo. Seba naye zî mîtîngê 3ê Sibate muhîm o û ganî pêro hetê ke edalet, haştîye û azadîye wazenê beşdarê nê mîtîngî bibê.”

Heta ke faşîzm û şer biqedîyo

Endama Meclîsê Partîye ya HDPyî Prof. Dr. Beyza Ustune zî seba ke beşdarê mîtîngê 3ê Sibate biba, veng daye her kesî û her hetî û wina va: “Ma bihêz îme, biqerar îme û heta peynîye, ma do biqerar dewam bikerê.  Ma her keso ke nêwazeno kes bimiro û nêwazeno kesî rê ezîyet bêro kerdene, her keso ke haştîye û edalet û demokrasî wazeno, dawetê mîtîngî kenîme. Ma welatêko winasî de ciwîyenîme ke, wezîrê Edaletî hûmara girewteyan nêzano. Handê zêde kes hepisxaneyan de yo. Yew welat de eke girewteyê sîyasîyî ke bibê, o welat de azadî û hiqûq ra nêno qalkerdene. Meydanê Teyareyan ê 3yîna de karkerî senî ameyî qirkerdene ma pêroyînan dî. Meyîtê karkeran erzîyayê rogaran. Merdiş hande bîya normal e. Edî hiqûq çin o û faşîzm her ca de rîyê xo musneno ma. Leyla Guvene, vera nê pêroyînan vengê xo kerd berz, Ma ke vengê aye meheşnîme, faşîzm do her ke şoro bibo berz û şîdet her ca ra bibo vila. Ma do heta ke faşîzm û şer biqedîyo, vengê xo bikerê berz û bi mucadeleyê xo dewam bikerê.” STENBOL