Polîs nêverdenî kesêk şêro pêşwazîya Leyla Guvene

Merkezê Xeberan

Polîsê tirkî Zindanê Amedî dorpêç kerdî û nêverdenî ke kesêk şêro pêşwazîya Leyla Guvene.

Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene seba wedarnayîşê tecrîdês erê Rayberê PKKyî Abdullah Ocalanî 79. rojî ya ke grevê vêşanîye de ya. 9. Mehkemaya Cezaya Giran ya Amedî qerarê serbest veradayîşê  Leyla Guvene daye. Polîsê tirkî heme hetê Zindanê Amedî dorpêç kerdî û nêverdenî kesêk şêro pêşwazîya Leyla Guvene.

Polîsî sere de kesê ke waştî şêrî vernîya Leyla Guvene tepiştî û vîşêrê kênaya aye Sabîha Temîzkane destûr nêdanî ke kesêk nizdîyê zindan bibo. Sabîha Temîzkan hesabê xo yê medyaya komelkî ser de mesajêk weşêna û va: “Ez zindan ver de ya. Tena destûr danî mi û merdimanê hepsîyan ke seba pêvnayîşî ameyî. Dormeyê zindan ameyo padayîş. Destûr nêdanî ke wekîlê HDPyî zî bêrî vernîya dayîka mi. Ez ê tena do dayîka xo pêşwazî bikera.”

Hemsereka Pêroyî ya HDPyî Pervîn Bûldan, Hemserekê KCDyî Berdan Ozturk û wekîlê HDPyî zî şîyî verê zindan. Labelê destûr nêdanî ke kesêk nizdîyê zindan bibo û dormeyê zindan bi barîkatan ameyo padayîş. Sewbîna destûr nêdanî rojnamegeran ke fotograf biancî.