Heyetê Ewropa piştî da çalakîya Leyla Guvene

Heyetê Ewropa ke seba piştîdayîşê çalakîya Leyla Guvene û taqîpkerdişê roniştişê doze aye ameybî Amed wina va: “Leyla Guvene heqdar a. Waştişê aye waştişê ma yî. Ganî tecrîd peynî bibo.”

Parlamentera HDPyî ya Colemêrgî û Hemsereka KCDyî Leyla Guvene seba tecrîdo giran serê Rayberê PKKyî Abdullah Ocalanî ra bêro wedartene dest bi grevê vêşanîye kerde. Çalakîya grevê vêşanîye ya Leyla Guvene kewte roja 80. Seba taqîpkerdişê roniştişê doza Leyla Guven Ewropa ra heyetêk ameybî Amed. Heyeto ke ame derheqê çalakîya Leyla Guvene de îzehetêk da.

Hemsereka Partîya Çep ya Fransaye Danielle Simonnete wina va: “Ma tehlîyekerdişê Leylaye ra kêfweş î. Waştişê aye waştişê ma yî. Ma wazenê ke bi hawayo lez no bêhuqûqî raşte ra wedarî yo. Ma wazenê tecrîd peynî bibo. Ma hemverê hewldayîşê dagirkerdişê Rojawan de zî vindenî. Çimkî şarê kurd Rojawan de hemverê DAIŞî de şer kerd û aştî pê ard. Cok ra ma Fransa de zî rayîrşîyayîş viraşt. Ma meclîsê xo de zî waştişanê Leyla Guvene ard ziwan û waştişê xo yê peynîkerdişê tecrîdî zî va. Seba ke tecrîd peynî bibo, ganî hukmat bi lez gaman bierzo.”

Ma hem bîyî şahidê tehlîyekerdişê Leylaye û hem zî faşîzmî

Hektara Serektîya Yeşiller Lorena Lopez Lacale zî wina va: “Ma serê esasanê demokratîkî de têkoşîn danî. Waştişê Leylaye seba demokrasî yî. Ma vanê wa heme kes bi kultur û hunerê xo bicuyo. Ma hem bîyî şahidê tehlîyekerdişê Leylaye û hem zî faşîzmo ke Leyla û şarê kurdş ser de pê yeno. Çîimkî tîya de hewldayîşê aştîye yeno waştiş ke bêro krîmînalîzekerdiş. Ganî çareserîyêko huqûqî û sîyasî pê bêro. Ma do heta peynî piştî bidî çalakîya Leylaye. Ma soz danî Leyla û şarê kurdî ke ma do piştî bidî têkoşînê înan.”

Nameyê bînî yê ke heyet de ca gênî wina yî:

Johan Petter Andresen – Norveç Kizil Partî

Hakan Taş – Eyaletê Partîya Çep ya Almanya

Lydia Samarbakhsh – Berpirsîyara Têkiliyê Teber ya Partîya Kominîst ya Fransa

Sylvie Jan – Temsîlkara Fransa EgalCité

Jean-Christophe Sellin – Sekretera Mîyanneteweyî ya Partîya Çep ya Fransa

AMED